Taravari: Mospërfshirja e Maqedonisë në Bordin e Paqes është sinjal për paqartësi strategjike

Maqedonia e Veriut ende po pret ftesën nga presidenti amerikan Donald Trump për pjesëmarrje në të ashtuquajturin Bordi i Paqes – një iniciativë ndërkombëtare e konceptuar fillimisht për t’i dhënë fund luftës në Gaza, e më pas e zgjeruar edhe për konflikte të tjera globale. Nga rajoni, Kosova, Shqipëria dhe Bullgaria tashmë kanë marrë ftesë dhe janë pjesë e këtij trupi, ku Prishtina zyrtare dhe Sofja zyrtare janë bërë edhe anëtare themeluese.

Në këtë kontekst, lind pyetja se çfarë mesazhesh po i dërgohen Maqedonisë së Veriut nga “partneri strategjik” – Shtetet e Bashkuara të Amerikës.

Duke komentuar këtë zhvillim në një intervistë për portalin “Lokallno”, lideri i Aleancës për Shqiptarët, Arben Taravari, shprehet:

“Si shqiptar, ndihem mirë që Shqipëria dhe Kosova janë pjesë e Bordit të Paqes për Gazën. Por si qytetar i Maqedonisë së Veriut, sigurisht që ndihem i anashkaluar”, deklaron Taravari.

Sipas tij, mospërfshirja e Maqedonisë së Veriut në këtë iniciativë përbën një sinjal të qartë se vendi duhet të artikulojë më qartë qëndrimet e tij ndërkombëtare.

“Kjo është një thirrje e hapur që të jemi më të qartë në pozicionet tona, veçanërisht në rrugën që duam të ndjekim”, përfundon Taravari.