Gashi dhe Miloshoski takojnë në Uashington Daniel Twining, president i IRI

Kryetari i Kuvendit Afrim Gashi i shoqëruar edhe nga Nënkryetari i Kuvendit Antonio Miloshoski, kanë zhvilluar një takim me Daniel Twining, President i Institutit Republikan Ndërkombëtar (IRI), ku u diskutua për bashkëpunimin dypalësh dhe projektet e përbashkëta ndërmjet Shteteve të Bashkuara të Amerikës dhe Maqedonisë së Veriut.

Gjatë takimit, bashkëbiseduesit shkëmbyen mendime mbi rëndësinë e mbështetjes së vazhdueshme amerikane në forcimin e institucioneve demokratike, sundimin e ligjit dhe zhvillimin e proceseve parlamentare në vend. U theksua se projektet e përbashkëta me IRI-n kanë kontribuar ndjeshëm në rritjen e kapaciteteve institucionale dhe në avancimin e standardeve demokratike.

Milošoski vlerësoi lart rolin e Institutit Republikan Ndërkombëtar dhe partneritetin strategjik me SHBA-në, duke theksuar se ky bashkëpunim paraqet një shtyllë të rëndësishme për stabilitetin politik dhe zhvillimin demokratik të Maqedonisë së Veriut.

Nga ana e tij, Daniel Twining riafirmoi përkushtimin e IRI-së dhe të Shteteve të Bashkuara për të vazhduar mbështetjen e projekteve që synojnë forcimin e demokracisë, transparencës dhe dialogut politik, si dhe për avancimin e bashkëpunimit institucional në rajon.

Takimi u zhvillua në frymë partneriteti dhe bashkëpunimi të hapur, ndërsa u shpreh gatishmëria për thellimin e mëtejmë të projekteve të përbashkëta në dobi të qytetarëve dhe institucioneve të vendit.