Mickoski: 25 milionë euro për transformimin e gjelbër të bizneseve

Kryeministri Hristijan Mickoski deklaroi sot se Qeveria e Maqedonisë së Veriut, me mbështetje financiare nga Bashkimi Evropian, ka nisur një projekt të rëndësishëm për mbështetjen e ndërmarrjeve të vogla dhe të mesme në procesin e transformimit të gjelbër.

Sipas Mickoskit, vlera totale e projektit është 25 milionë euro, prej të cilave 18 milionë euro janë siguruar nga Bashkimi Evropian, ndërsa 7 milionë euro nga Buxheti i shtetit. Nga kjo shumë, 22 milionë euro janë të dedikuara për mbështetje të drejtpërdrejtë financiare për kompanitë.

Ai theksoi se projekti synon uljen e ndotjes, rritjen e përdorimit të burimeve të rinovueshme të energjisë, zvogëlimin e gjurmës së karbonit dhe zbatimin e standardeve ndërkombëtare mjedisore, të cilat u mundësojnë kompanive dalje në tregjet evropiane dhe globale.

Në katër vitet e ardhshme pritet të përfitojnë mbi 300 kompani, ndërsa rreth 200 prej tyre do të marrin mbështetje për përgatitjen dhe zbatimin e standardeve ndërkombëtare për mbrojtjen e mjedisit dhe zhvillim të qëndrueshëm.

Kryeministri nënvizoi se transformimi i gjelbër nuk është shpenzim, por investim në një ekonomi më të fortë, mjedis më të shëndetshëm dhe cilësi më të lartë të jetës për qytetarët.