Pesë milionë për kokën e tij: Kush është bosi famëkeq i mafias evropiane që u arrestua në Dubai?

Daniel Kinahan, një trafikant irlandez droge dhe një nga figurat kryesore të krimit të organizuar në Evropë, është arrestuar në Dubai në një operacion të fshehtë që u mbajt sekret për muaj të tërë.

Një qendër tregtare dhe një restorant indian pranë Burj Khalifa thuhet se ishin vendet kryesore nga të cilat autoritetet monitoruan në mënyrë diskrete lëvizjet e Kinahan. Operacioni u krye në fshehtësi të plotë dhe nuk u publikuan informacione të mëtejshme derisa arrestimi u konfirmua nga policia irlandeze të premten në mbrëmje.

Një faktor kyç në këtë rast duket se ka qenë marrëveshja e re e ekstradimit midis Irlandës dhe Emirateve të Bashkuara Arabe, e cila hyri në fuqi në vitin 2025 dhe u aktivizua për herë të parë në rastin e Kinahan, duke lejuar një gjyq të shpejtë.

Me rëndësi të veçantë në hetim ishte sekuestrimi dhe analiza e mesazheve të koduara nga një pajisje Blackberry që i përkiste një bashkëpunëtori në rrjet. Një oficer policie thuhet se arriti të bënte një foto të mesazheve para se ato të fshiheshin, duke parandaluar humbjen e informacionit thelbësor. Autoritetet besojnë se këto të dhëna e lidhin Kinahan me urdhra për vrasje dhe plane operative për të eliminuar rivalët, një element që forcon akuzat kundër tij.