Kaos tek Irani në Botëror, vizës së një lojtari për SHBA i doli afati menjëherë pas ndeshjes

Irani ka pësuar një goditje të madhe pasi njërit prej lojtarëve të tij i ka skaduar viza vetëm disa orë pas ndeshjes së parë në Kupën e Botës.

Pas një periudhe kaotike përgatitore, me shumë komplikime në aplikimet për viza dhe me një zhvendosje të detyruar në kampin bazë në Tijuana të Meksikës, Irani e nisi fushatën e tij me një barazim 2-2 ndaj Zelandës së Re në stadiumin “SoFi” në Inglewood të Kalifornisë.

Skuadra u kthye menjëherë pas ndeshjes për t’u përgatitur për takimin e radhës, i cili gjithashtu do të zhvillohet në stadiumin “SoFi” kundër Belgjikës më 21 qershor.

Megjithatë, ata janë tronditur pasi një nga yjet e ekipit mësoi se viza e tij kishte skaduar.

Sipas “AFP-së”, duke cituar agjencinë shtetërore të lajmeve “IRNA”, anësori Mehdi Torabi kishte vetëm një vizë me një hyrje të vetme dhe jo vizë me hyrje të shumëfishta.

Megjithëse një numri të madh anëtarësh të stafit dhe zyrtarësh iu refuzuan aplikimet për viza, të gjithë lojtarët pjesëmarrës arritën të pajiseshin me viza.

Sipas “IRNA”, Federata Iraniane e Futbollit “ka ndërmarrë hapa për të siguruar një vizë të re për Torabin, në mënyrë që ai të mund ta shoqërojë kombëtaren në ndeshjet e ardhshme”.

Kapiteni Mehdi Taremi gjithashtu raportohet se hasi vështirësi në aeroportin “LAX”, ndërsa Irani po përgatitej të hipte në fluturimin e kthimit drejt Tijuanës.

Të tri ndeshjet e grupit të Iranit zhvillohen në Shtetet e Bashkuara, me përballjen e fundit që do të luhet kundër Egjiptit në Seattle.