Kuvendi rrëzon interpelancën ndaj Cvetan Tripunovskit, ministri mbetet në detyrë
Kuvendi sonte hodhi poshtë interpelancën ndaj ministrit të Bujqësisë, Pylltarisë dhe Ekonomisë së Ujërave, Cvetan Tripunovski. Për interpelancën votuan 21 deputetë, kundër ishin 62, ndërsa nuk pati asnjë votë të përmbajtur.
Nisma për interpelancë ishte dorëzuar nga deputetët e Lidhja Socialdemokrate e Maqedonisë dhe Koalicionit për të Ardhmen Evropiane, të cilët e akuzuan ministrin për rezultate të dobëta në sektorin e bujqësisë, ulje të subvencioneve, premtime të parealizuara, rënie të çmimeve të grumbullimit, bllokim të fondeve evropiane dhe pakënaqësi te bujqit. Opozita kërkoi përgjegjësi politike dhe dorëheqjen e Tripunovskit.
Shumica qeverisëse e cilësoi interpelancën si të pabazuar dhe të motivuar politikisht, duke theksuar se synimi i saj ishte të largonte vëmendjen nga gjendja e trashëguar në sektorin e bujqësisë nga qeverisja e kaluar.
Në fjalimin e tij para deputetëve, Tripunovski i hodhi poshtë akuzat e opozitës dhe theksoi se Ministria po shënon rezultate pozitive. Ai deklaroi se eksporti i produkteve bujqësore në vitin 2025 është rritur me 85 milionë euro krahasuar me vitin paraprak, duke arritur në 417 milionë euro.
Sipas tij, rritje është regjistruar edhe në grumbullimin e produkteve bujqësore, ndërsa një numër gjithnjë e më i madh bujqish po e plasojnë prodhimin e tyre drejtpërdrejt në tregje, zinxhirë tregtarë dhe objekte hotelierike.
“Interpelanca nuk do të më lëkundë në vazhdimin e reformave që kemi premtuar. Ne vazhdojmë me modernizimin e bujqësisë, investimet në sistemet e ujitjes dhe miratimin e zgjidhjeve ligjore që do të sigurojnë zgjidhje afatgjata për problemet”, deklaroi Tripunovski.
Ai u dërgoi mesazh bujqve se Ministria do të vazhdojë të jetë partneri i tyre dhe se Qeveria do të vijojë me masat mbështetëse për sektorin.
Nga VMRO-DPMNE thanë se interpelanca ishte një përpjekje e SDSM-së për të vënë në pikëpyetje rezultatet e ministrit aktual. Deputetja Emilija Angelova vlerësoi se opozita nuk ka kredibilitet të flasë për gjendjen në bujqësi, duke kujtuar protestat e bujqve dhe problemet me pagesat gjatë periudhës kur SDSM ishte në pushtet.
Me votimin në Kuvend, Tripunovski e ruajti besimin e shumicës parlamentare dhe mbetet në detyrën e ministrit të Bujqësisë, Pylltarisë dhe Ekonomisë së Ujërave.
