Reali i kërkon UEFA-s që t’ia largojë Barcelonës disa tituj

Real Madridi ka kërkuar në mënyrë sensacionale që Barcelonës t’i hiqen disa nga titujt e saj historikë, ndërsa pasojat e skandalit “Negreira” po arrijnë në një pikë vendimtare.

Pas rizgjedhjes së tij dominuese, Florentino Perezi ka kaluar në ofensivë duke dorëzuar një dosje të gjerë ligjore në selinë e UEFA-s.

Pas fitores së thellë 65–35 që i siguroi vazhdimësinë në presidencë, Perezi nuk ka humbur kohë për të përshkallëzuar përplasjen e Real Madridit me rivalët e përjetshëm.

Klubi ka dërguar zyrtarisht një dosje “shpërthyese” ligjore në UEFA, të vetmin organ drejtues që sipas Madridit ka autoritetin për të vendosur “dënimin shembullor” që ata kërkojnë.

Ndërsa raportimet e mëhershme fokusoheshin në një ndalim të mundshëm nga garat evropiane, tashmë thuhet se drejtuesit e “Bernabéut” po kërkojnë një hap edhe më ekstrem: fshirjen e titujve të kaluar të Barcelonës nga librat e historisë.

Ky veprim tregon një prishje totale të marrëdhënieve mes dy klubeve më të mëdha në Spanjë.

Perezi ka qenë i prerë në qëndrimet e tij, duke deklaruar më herët se marrëdhënia mes dy gjigantëve spanjollë është “e vdekur”.

Sipas “AS”, raporti i dërguar në Nyon është një dokument prej 500 faqesh, i detajuar me kujdes.

Ai përmban atë që zyrtarët e Madridit e përshkruajnë si “prova të qarta” të korrupsionit sistematik që ka ndikuar në rezultatet e La Ligës për një periudhë 20-vjeçare.

Dokumentacioni përfshin gjithashtu një analizë sezon pas sezoni të pikëve që Real Madridi pretendon se i janë “vjedhur” për shkak të njëanshmërisë në gjykim.

Perezi ka bërë edhe akuza të detajuara më herët, duke pretenduar se “këtë sezon na janë marrë mes 16 dhe 18 pikë”.

Duke dorëzuar këtë material në UEFA, Madridi shpreson të bindë presidentin Aleksander Ceferin se një gjobë e thjeshtë apo pezullim i përkohshëm nuk është i mjaftueshëm për shkallën e shkeljeve të pretenduara.