Van Dijku bëhet lojtari i parë që e adreson ‘problemin’ e pauzave për hidratim në Botëror

Kapiteni i Holandës, Virgil van Dijku, është bërë lojtari i parë që ka komentuar publikisht pushimet e reja për hidratim të futura gjatë ndeshjeve të Kupës së Botës 2026.

“Oranje” e nisi fushatën e saj në Kupën e Botës kundër Japonisë në Arlington të Teksasit të dielën (14 qershor), me disa emra të njohur në formacionin e trajnerit Ronald Koeman.

Në portë ishte Bart Verbruggen, ndërsa në qendër të mbrojtjes Van Dijk luajti përkrah Jan Paul van Hecke. Në krahun e majtë të mbrojtjes u aktivizua Micky van de Ven.

Në mesfushë luajtën Ryan Gravenberch dhe Tijjani Reijnders, ndërsa në sulm ishin ndër të tjerë Crysencio Summerville, Donyell Malen dhe Cody Gakpo.

Pas një pjese të parë pa shumë emocione, ndeshja u gjallërua menjëherë pas pushimit.

Van Dijku hapi rezultatin me një gol me kokë.

Megjithatë, Japonia reagoi shpejt dhe barazoi vetëm gjashtë minuta më vonë përmes Keito Nakamura.

Një goditje e bukur e Summerville riktheu avantazhin e holandezëve në minutën e 65-të, por ndeshja përfundoi 2-2 pasi mesfushori i Crystal Palace, Daichi Kamada, shënoi me kokë dy minuta para fundit.

Pavarësisht spektaklit në pjesën e dytë, Van Dijku u pyet pas ndeshjes për mendimin e tij mbi pushimet e reja për hidratim, të cilat janë futur për këtë turne.

Pavarësisht kushteve atmosferike, FIFA po aplikon pushime treminutëshe në mes të secilës pjesë si pjesë e qasjes së saj të re për mirëqenien e lojtarëve.

Gjyqtarët këshillohen të ndërpresin lojën në minutën e 22-të të secilës pjesë, duke u dhënë mundësi lojtarëve të hidratohen pavarësisht temperaturës apo kushteve të motit.

Disa lojtarë dhe trajnerë kanë kritikuar këtë risi, dhe Van Dijk nuk duket të jetë një mbështetës i madh i saj.

Duke folur për gazetarët në “Dallas Stadium”, mbrojtësi deklaroi: “Pushimet për hidratim janë vërtet interesante. Kam parë pothuajse të gjitha ndeshjet deri sot. Mendoj se sa herë që kalojmë në reklama, nuk është diçka që më pëlqen. Mendoj se as për shikuesit neutralë në televizion nuk është diçka e mirë. Nëse është vërtet shumë vapë, atëherë është në rregull të futen, por mendoj se duhet të vlerësohet secila ndeshje veçmas. Besoj se kam thënë mjaftueshëm për këtë temë”.

Holanda rikthehet në fushë më 20 qershor kundër Suedisë.

Van Dijku nuk është i vetmi që ka shprehur shqetësime. Ish-trajneri i Liverpoolit, Jürgen Klopp, ka deklaruar se këto ndërprerje prishin ritmin e ndeshjeve.

Gjermani i përshkroi pushimet treminutëshe si “asgjë më shumë sesa një kafaz i artë i ndërtuar për sponsorët”.

Duke folur për transmetuesin gjerman “ZDF”, Klopp tha: “Kur pashë lojtarët duke qëndruar thjesht në këmbë gjatë pushimeve për vapën, ndërsa ndërprerjet televizive diktonin ritmin e ndeshjes, nuk mund të mos pyesja veten: kujt i shërben vërtet Kupa e Botës? Tifozëve? Lojtarëve? Apo reklamuesve? Një ndeshje e Kupës së Botës duhet të rrjedhë si një lumë. Në vend të kësaj, ne ndërtojmë diga në mes të saj që reklamat të mund të kalojnë. Futbolli dikur ishte ngjarja kryesore, por tani rrezikon të bëhet vetëm muzika në sfond e një spektakli reklamash”.