“Kërcënuan se do ta përdhunojnë Vuçiqin”: Bërnabiq i drejtohet BE-së për videon me sapun dhe burg

Kryetarja e Kuvendit të Serbisë, Ana Bërnabiq, u është drejtuar përfaqësuesve evropianë, përfshirë komisioneren për Zgjerim Marta Kos, si dhe partive në Parlamentin Evropian, lidhur me një video parazgjedhore të publikuar nga studentët e Fakultetit të Arteve Dramatike (FDU) në Beograd.

Sipas interpretimit të Bërnabiqit, videoja përmban kërcënim për përdhunimin e presidentit serb Aleksandar Vuçiq. Ajo u bëri thirrje përfaqësuesve evropianë ta shohin videon dhe të vlerësojnë nëse përmbajtja e saj promovon vlerat demokratike dhe kulturën politike.

Videoja me titull “Serbia nuk e donte”, e publikuar më 19 shtator, paraqet Vuçiqin në fokus, ndërsa më pas shfaqen mesazhe të qytetarëve që thonë se nuk e duan atë për president dhe se nuk është i mirëpritur.

Bërnabiq reagoi veçanërisht ndaj pjesës ku përmendet burgu dhe pamjes së fundit, ku shfaqet një sapun nën dushin e burgut, të cilën ajo e interpretoi si aludim për dhunë seksuale.

“Pamja e fundit me sapunin në qeli është kërcënim i drejtpërdrejtë se Aleksandar Vuçiq do të përdhunohet për shkak të qëndrimeve të ndryshme politike”, shkroi Bërnabiq në rrjetin social X.