“Liria ka Emër” organizon dy tubime në Hagë në mbështetje të ish-krerëve të UÇK-së

Platforma qytetare “Liria ka Emër” ka paralajmëruar organizimin e dy tubimeve në Hagë, më 15 dhe 16 shtator, në prag dhe në ditën kur pritet shpallja e aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit.

Sipas njoftimit, tubimet do të mbahen në Malieveld të Hagës dhe synojnë të shprehin mbështetje për ish-krerët e Ushtrisë Çlirimtare të Kosovës, si dhe të mbrojnë, sipas organizatorëve, “të vërtetën dhe historinë e luftës çlirimtare të Kosovës”.

Tubimi i parë është planifikuar për të martën, më 15 shtator, nga ora 20:00 deri në 23:00.

Ndërsa tubimi i dytë do të mbahet të mërkurën, më 16 shtator, nga ora 07:00 deri në 15:00.

“Liria ka Emër” u ka bërë thirrje bashkatdhetarëve dhe të gjithë qytetarëve të interesuar që t’u bashkohen tubimeve në Hagë.