Sefer Selimi: “Jeton Shazivari po bëhet më katolik se Papa”

Analisti politik Sefer Selimi ka kritikuar ministrin e Drejtësisë, Jeton Shazivarin, duke e lidhur qasjen e tij të fundit politike me shprehjen popullore “bëhet më katolik se Papa”.

Në një reagim të tij, Selimi thotë se Shazivari, i cili më herët ka qenë i angazhuar në komisione dhe grupe pune gjatë periudhës së qeverisjes së BDI-së, sot ka ndryshuar qëndrim dhe po tregohet, sipas tij, më i ashpër në disa çështje që prekin shqiptarët.

“Ka një fenomen tek ne që në gjuhën popullore shpjegohet përmes shprehjes: ‘Bëhet më katolik se Papa’”, shkruan Selimi.

Ai pretendon se Shazivari, pas emërimit në postin e ministrit të Drejtësisë, ka ndërmarrë qëndrime që, sipas tij, përputhen me politika të VMRO-DPMNE-së.

Selimi e kritikon veçanërisht për deklaratat që lidhen me çështje të ndjeshme politike dhe me të drejtat e shqiptarëve, duke pretenduar se ministri po përpiqet të dëshmojë lojalitet ndaj partnerëve të rinj politikë.

“Shazivari nuk mjaftohet me shpërblimin që mori. Ai dëshiron të dëshmojë se është militant”, shkruan Selimi, duke e përmbyllur reagimin me shprehjen: “Të bëhet më katolik se Papa.”

Deklaratat e Selimit përbëjnë kritikën e tij politike ndaj ministrit Shazivari, ndërsa qëndrimet e përmendura i takojnë autorit të reagimit.