Ajri i ndotur në Maqedoni, Rokas paralajmëron ndryshime të mëdha: BE-ja premton mbështetje!

Ambasadori i Bashkimit Evropian në Maqedoninë e Veriut, Michalis Rokas, ka vlerësuar përpjekjet e vendit për përmirësimin e cilësisë së ajrit dhe mbrojtjen e mjedisit, duke paralajmëruar mbështetje të mëtejshme nga BE-ja.

Gjatë prezantimit të rezultateve të projektit për zbatimin e direktivave evropiane për cilësinë e ajrit, Rokas theksoi se përmirësimet kërkojnë bashkëpunim ndërinstitucional dhe investime afatgjata.

Sipas tij, masat që po ndërmerren mund të sjellin ndryshime të ndjeshme në cilësinë e ajrit gjatë dhjetë viteve të ardhshme.

Ai nënvizoi nevojën për koordinim mes ministrive të Mjedisit, Transportit dhe Bujqësisë, si dhe për investime në menaxhimin e mbetjeve dhe impiantet e riciklimit.

“BE-ja do ta mbështesë këtë tranzicion përmes fondeve IPA”, deklaroi Rokas, duke shtuar se rezultatet nuk mund të priten menjëherë, por kërkojnë angazhim të vazhdueshëm.