Janë ndarë çmimet shtetërore “23 Tetori”: Jolevski, Stojkov dhe Lilçiq Adams laureatët e sivjetshëm
Çmimi shtetëror “23 Tetori” përfaqëson një urë lidhëse mes trashëgimisë historike maqedonase dhe arritjeve bashkëkohore në shkencë, kulturë dhe art, theksoi kryetari i Këshillit për ndarjen e çmimit dhe drejtori i Institutit të Historisë Kombëtare, prof. dr. Mitko Panov, në ceremoninë solemne të ndarjes së këtij vlerësimi shtetëror për vitin 2026.
Këtë vit, çmimi prestigjioz iu nda aktorit Gjorgji Jolevski në fushën e kulturës dhe artit, si dhe historianit prof. dr. Stojko Stojkov dhe arkeologut prof. dr. Viktor Lilçiq Adams në fushën e shkencës.
Në fjalimin e tij, Panov theksoi se 23 Tetori është një datë që ka krijuar në mënyrë aktive trajektoren historike dhe kombëtare maqedonase, duke nënvizuar se liria dhe shtetësia nuk i përkasin vetëm së kaluarës, por konfirmohen edhe sot përmes punës së institucioneve, shkencës dhe krijimtarisë kulturore.
“Ka data që historia i shënon, por ka edhe data që e krijojnë historinë. Data që bëhen simbole të lirisë, dinjitetit dhe këmbënguljes historike të popujve dhe kombeve. Një datë e tillë është pikërisht 23 Tetori”, deklaroi Panov.
Duke folur për laureatët, ai theksoi se Jolevski me karrierën e tij aktoriale e ka bërë teatrin një hapësirë të lidhjes shpirtërore me publikun, Stojkov me veprimtarinë e tij shkencore ka dëshmuar rëndësinë e historiografisë për vetënjohjen kombëtare, ndërsa Lilçiq Adams ka dhënë kontribut të jashtëzakonshëm në studimin dhe mbrojtjen e trashëgimisë kulturore dhe historike maqedonase.
Në emër të fituesve foli prof. dr. Viktor Lilçiq Adams, i cili tha se Maqedonia posedon një vazhdimësi historike dhe qytetëruese që rrallë ndonjë shtet në botë mund ta dëshmojë.
“Sot armët janë zëvendësuar me vepra dhe rezultate kulturore e shkencore. Nëse i japim dritën e gjelbër mendjes, të udhëhequr nga zhvillimi i kulturës dhe veçanërisht i shkencës, Maqedonia ka një mundësi të madhe të përjetojë një zhvillim shumë më të madh në të ardhmen e pasigurt që e pret”, porositi Lilçiq Adams, duke shtuar se ky vlerësim përfaqëson edhe një obligim të madh për krijimtari dhe angazhim të mëtejshëm.
