“Jemi përballë një tragjedie njerëzore”, mbi 900 efektivë në terren, policia spanjolle vijon identifikimin e vaktimave përmes ADN-së

Autoritetet spanjolle vijojnë përpjekjet për identifikimin e 69 viktimave, ndërsa ekipet e emergjencës po punojnë në terren. Qeveria ka kërkuar hetim të plotë për të përcaktuar shkaqet e aksidentit.

Përfaqësuesi i qeverisë spanjolle, Domenec Ruiz Devesa, ka bërë thirrje për përgjegjësi dhe transparencë pas aksidentit të rëndë hekurudhor në Spanjë.

Në një intervistë për programin “Today” të BBC-së, Devesa theksoi se ngjarja nuk lidhet domosdoshmërisht me një mungesë të përgjithshme investimesh në rrjetin hekurudhor spanjoll. Sipas tij, aksidenti i fundit ndryshon ndjeshëm nga një tjetër ngjarje e ndodhur më herët gjatë këtij viti në të njëjtën linjë hekurudhore, ku humbën jetën më shumë se 40 persona.

Devesa tha se, sipas hipotezës kryesore paraprake, aksidenti mund të jetë shkaktuar fillimisht nga një defekt në sistemin elektronik dhe më pas nga një gabim njerëzor. Ai nënvizoi nevojën për një rishikim teknik dhe të politikave të sigurisë pas tragjedisë. Megjithatë, autoritetet theksojnë se shkaku përfundimtar duhet të përcaktohet përmes hetimeve.

Kryeministri spanjoll, Pedro Sanchez, bëri të ditur se në zonën e prekur janë ngritur qendra asistence për të mbështetur familjarët e viktimave dhe personat e prekur nga aksidenti.

Sipas tij, po ofrohet edhe mbështetje psikologjike për familjarët, të mbijetuarit dhe personat që ndodheshin pranë vendit të ngjarjes. Sanchez vlerësoi punën e ekipeve të shpëtimit, duke e cilësuar përpjekjen e tyre si të jashtëzakonshme, dhe siguroi se qeveria po punon intensivisht për të zbardhur shkaqet e aksidentit.

Një zëdhënës i Guardia Civil i tha BBC-së se në operacion janë angazhuar më shumë se 900 persona nga departamente të ndryshme të specializuara. Prioriteti kryesor mbetet identifikimi i viktimave, një proces që, sipas autoriteteve, mund të kërkojë kohë.

Familjarëve që kanë të afërm të zhdukur u është bërë thirrje të paraqiten në qendrat e posaçme të ngritura në zonë, ku mund të japin mostra të ADN-së për të ndihmuar në identifikimin e viktimave. Autoritetet nuk kanë dhënë ende një përgjigje përfundimtare nëse numri i viktimave mund të rritet, duke theksuar se për momentin përparësi mbetet identifikimi i personave të përfshirë në tragjedi.

Presidenti i rajonit të Castilla-La Mancha, Emiliano Garcia-Page, gjatë një konference për shtyp me kryeministrin Sanchez, shprehu mirënjohjen për personelin që po merr pjesë në operacionet e shpëtimit dhe kujdesit shëndetësor.

Ai bëri të ditur se ka pasur lajme pozitive për gjendjen e disa prej të mbijetuarve të shtruar në spital dhe u bëri thirrje qytetarëve të dhurojnë gjak në ditët në vijim.

“Jemi përballë një tragjedie njerëzore”, theksoi Garcia-Page, duke nënvizuar se ende nuk janë gjetur të gjitha trupat dhe se ka persona që vazhdojnë të rezultojnë të zhdukur.

Autoritetet spanjolle vijojnë operacionet e emergjencës, ndërsa vendi pret përgjigje për rrethanat që çuan në një tjetër tragjedi të rëndë hekurudhore.