“Më shumë gjasa ka të mos kthehet”, motra e Ronaldos ia shuan shpresat Kombëtares portugeze

Elma Aveiro dyshon se Cristiano Ronaldo do të rikthehet te Portugalia, pavarësisht se ylli portugez deklaroi se dëshiron të vazhdojë të luajë për kombëtaren. Ajo pranoi se raportet mes Ronaldos dhe trajnerit Jorge Jesus janë në një pikë të vështirë.

E ardhmja e Cristiano Ronaldos te kombëtarja e Portugalisë vazhdon të jetë e paqartë.

Këtë herë, dyshimet janë shtuar nga motra e tij, Elma Aveiro, e cila beson se mundësitë që sulmuesi të rikthehet janë më të vogla sesa ato për t’u larguar përfundimisht.

Duke folur në një prezantim libri, ku ishte i pranishëm edhe përzgjedhësi i Portugalisë, Jorge Jesus, Elma komentoi krizën që shpërtheu pas largimit të papritur të vëllait të saj nga grumbullimi i kombëtares.

“Mendoj se gjasat që ai të mos kthehet janë më të mëdha sesa ato që të rikthehet. Besoj se të dy, Ronaldo dhe Jesus, janë të lënduar. Ishte një situatë që e përjetuan ata, jo unë, por po flas në emër të vëllait tim”, deklaroi ajo, sipas mediave portugeze, përcjell “Gazeta Express”.

“Besoj se situata ka arritur në një pikë pa rrugëdalje. Do të shohim se çfarë do të ndodhë. Nuk e di, është një çështje jashtëzakonisht e ndërlikuar. Kur ndihesh i tradhtuar, është shumë e vështirë që gjërat të kthehen siç kanë qenë më parë”, shtoi Elma.

Motra e yllit portugez e shprehu pakënaqësinë edhe për mënyrën se si, sipas saj, është trajtuar Ronaldo, duke theksuar se kontributi i tij ndër vite për kombëtaren nuk duhet të harrohet.

“Ndihem e trishtuar, sepse populli portugez, për fat të keq, po harron atë që është arritur deri më tani dhe mendon se gjërat duhet të jenë ndryshe në të tashmen”, u shpreh ajo.

“Madje nuk i gjej fjalët për ta përshkruar, sepse është shumë e vështirë ta shoh vëllain tim duke kaluar nëpër këtë situatë. Ai është njëri nga njerëzit që më së paku e meriton atë që po i ndodh”, theksoi Elma.

Edhe nëna e Ronaldos, Dolores Aveiro, e kishte shprehur më herët pakënaqësinë e saj për mënyrën se si është trajtuar djali i saj gjatë kësaj periudhe.

Kujtojmë se Cristiano Ronaldo u largua nga grumbullimi i Portugalisë pas pakënaqësive lidhur me rolin e tij në skuadër dhe mosaktivizimin në ndeshjen ndaj Norvegjisë.

Më pas, ai e publikoi një deklaratë të gjatë, në të cilën e shpjegoi versionin e tij të ngjarjeve dhe konfirmoi se nuk dëshiron të pensionohet nga futbolli ndërkombëtar.

Kapiteni portugez e pranoi se duhet të mbajë përgjegjësi për veprimet e tij dhe deklaroi se do të jetë në dispozicion të kombëtares pasi ta vuajë dënimin përkatës.

Federata Portugeze e Futbollit ka nisur procedurë disiplinore ndaj tij, ndërsa Ronaldo është pezulluar përkohësisht nga kombëtarja.