Jonuzi për TV Telma: “Grupi i zjarrit” braktisi BDI-në duke vendosur të veprojnë si fraksion!

Bashkimi Demokratik për Integrim (BDI) shpreh keqardhjen që pesë anëtarë të Kryesisë Qendrore u larguan vetë nga partia. Përmes një njoftimi partiak kanë bërë të ditur se ky është një nga konkluzionet e arritura të premten në mbledhjen e kryesisë në selinë partike në Reçicë të vogël.

Bëhet fjalë për anëtarët e të ashtuquajturit “Grupi i zjarrit” i cili para dy muajsh vendosi se do të vepronte si fraksion.

“Kryesia Qendrore shpreh keqardhje të thellë për vendimin e pesë anëtarëve të Kryesisë që të tërhiqen nga Kryesia Qendrore e Bashkimit Demokratik për Integrim, vendim të cilin e morën në mbledhjen e mbajtur më 1 prill 2023”, thuhet në kumtesën e BDI-së.

Gazetari Destan Jonuzi në një prononcim për TV Telma ka deklaruar se “Grupi i zjarrit” duke vendosur të veprojnë si fraksion kanë shkelur statutin e partisë, i cili nuk njeh fraksion dhe kjo do të thotë braktisje e organeve të partisë.

Sipas tij, ata nuk do të formojnë parti por do të mundohen ta dëshmojnë legjitimitetin e betejës së tyre politike.

“Vendimi i fundit i BDI-së është verifikim i deklaratës së Ali Ahmetit të dhënë më 1 prill, por kësaj radhe ka kaluar edhe filtrat partiakë dhe ka marrë dritë jeshile nga kryesia e partisë. Është befasi për mendimin tim që nga pesë të përjashtuarit apo të vetëpërjashtuarit nuk figuron emri i Musa Xhaferit. Deklaratat dhe akuzat e ashpra të fundit të Izet Mexhitit ndaj bashkëpartiakëve vetëm tregojnë se ai ka vendosur ta vazhdojë betejën me Ahmetin. Vlerësoj se ai dhe grupi i tij nuk do të kenë guxim dhe as nuk do të tentojnë të formojnë parti politike”, thotë për TV Telma, gazetari Destan Jonuzi.