Për të pasur një hekurudhë të shpejtë na duhen 4 miliardë euro!

Edhe nëse traseja aktuale rindërtohet plotësisht, trenat nuk do të mund të ecin më shumë se 100 kilometra në orë. Është edhe plani për një linjë krejtësisht të re nga Shkupi në Gjevgjeli, por për këtë duhen 4 miliardë euro. Alternativa është rekonstruimi etapor, shkruan PRESSonline.al

Dikur mund të shkoje me tren në Mynih, Paris…, por sot mezi arrin në Gjevgjeli. Pavarësisht trenave të blerë kinezë, të orientuarit thonë se mjetet lëvizëse janë shumë modeste që ne të flasim për ndonjë intensifikim të trafikut të brendshëm hekurudhor, e lëre më të jashtëm. Brenda kufijve të vendit, linjat që kishim po pakësohen dhe nuk ka asnjë tren ndërkufitar në orarin e hekurudhave.

Nikolla Markov, drejtor në Hekurudhat-Infrastruktura, thotë se vitin e ardhshëm mund të presim një tren për Beograd dhe Selanik.

– Aktualisht po bëhet rekonstruim i një pjese të hekurudhës në Serbi dhe ka mundësi që ajo të përfundojë në pranverë. Kur të përfundojë rekonstruimi, sipas njoftimeve të deritanishme nga Beogradi, pritet që të ketë një tren nga Beogradi në Shkup dhe pritet që serbët të jenë të interesuar që ai të shkojë edhe në Selanik, kështu që mund të presim edhe një tren për në Selanik – thotë Markov.

Për në Budapest nëpërmjet hekurudhës serbe të shpejtësisë së lartë

Këtë vit, Serbia njoftoi se ka marrë 600 milionë euro fonde të pakthyeshme për ndërtimin e një hekurudhe të shpejtë nga Beogradi në Nish. Nga ana tjetër, këto ditë ka mbërritur lajmi se hekurudha e Serbisë paralajmëron trena të shpejtë në pjesën nga Nishi deri në kufirin me Maqedoninë dhe se projekti kushton 182 milionë euro. Por çfarë pas kufirit maqedonas? A do të mbetemi një zorrë qorre në rajon?

Markov thotë se treni do të arrijë në Shkup, sepse projekti që Serbia po e shtyn sipas tenderit të tyre është hekurudha e shpejtë për në Shkup. Ai pret që gjërat të shkojnë shpejt për atë hekurudhë, por për lidhjen tonë me Greqinë, me të njëjtën hekurudhë, paratë janë vendimtare dhe është një investim i madh që nuk mund ta përballojmë.

– Kemi dy mundësi për hekurudhën nga Shkupi në Gjevgjeli. Njëra është një rrugë krejtësisht e re, sipas direktivës së BE-së, dhe tjetra është një rindërtim i hekurudhës. Në mënyrë që hekurudha të jetë sipas standardeve të BE-së, në stacion duhet të ketë një binar 740 metra të gjatë. Ne nuk kemi asnjë stacion të tillë. Për trenat që do të ecin me shpejtësi 160 kilometra në orë, nevojiten kthesa të ndryshme. Pra, në atë rast na duhet një rrugë krejtësisht e re, dhe kjo kushton rreth 4 miliardë euro. Nëse hyjmë në BE, atëherë 80 për qind e ndërtimit të rrugës së re do të financohej nga fondet evropiane. Është duke u bërë plan edhe për rindërtimin e hekurudhës, fillimisht në pjesën Shkup – Veles, por edhe në hekurudhën e rikonstruktuar mund të vozitësh deri në 100 kilometra në orë – thotë Markov, përcjell PRESSonline.al

Ai thotë se pala maqedonase ka shprehur gatishmëri për projektin e lidhjes regjionale hekurudhore, ndërsa Ministria e Transportit është nënshkruar si pjesë e hekurudhës së shpejtë, por se “çelësi është te financat”.

Infrastruktura hekurudhore e Serbisë njoftoi se menaxhmenti nga Serbia i njoftoi mysafirët nga Maqedonia për përvojat në lidhje me ndërtimin e hekurudhës së shpejtë Beograd-Novi Sad, me shpejtësi 200 kilometra në orë, si dhe për rezultatet dhe efektet e arritura nga zbatimi i këtij projekti. Nga aty shtojnë se është folur për vazhdimin e ndërtimit të hekurudhës së shpejtë nga Novi Sadi në Suboticë e më tej në Budapest.

Shumë plane dhe dëshira dekadash

Në periudhën 2023-2025 janë planifikuar investime në infrastrukturën hekurudhore në shumën totale prej 196 milionë euro. Aktivitetet investuese do të synohen kryesisht për rindërtimin dhe ndërtimin e Korridorit 8 (pjesa lindore). Investimet tjera përfshijnë modernizimin e impianteve ET në Korridorin 10 dhe Korridorin 8, përgatitjen dhe rishikimin e dokumentacionit teknik dhe prokurimin e pajisjeve, shkruhet në planin e biznesit për vitin 2023 të Hekurudhave të Maqedonisë, informon PRESSonline.al

Projektet e mëdha të infrastrukturës, si hekurudha “e përjetshme” për në Bullgari, mbeten gjithashtu për t’u përfunduar. Për projektin është dhënë një grant prej 60.7 milionë euro nga IPA, më shumë se 149 milionë euro janë rënë dakord me Bankën e Investimeve të Ballkanit Perëndimor dhe vlera totale e projektit është gati 489 milionë euro.

Në planin e biznesit për këtë vit është përfshirë edhe rindërtimi i hekurudhës Kumanovë-Beljakovcë, i cili ka filluar në vitin 2014 dhe BERZH ka siguruar 23 milionë euro.

Pikërisht 3 vite më parë u shpall edhe hekurudha drejt Shqipërisë. Bëhet fjalë për një seksion prej 63 kilometrash nga Kërçova në Linin shqiptar. Për të gjithë projektin shteti njoftoi se do të kërkojë rreth 500 milionë euro nga institucionet financiare dhe kreditorët ndërkombëtarë. Ministri i Transportit dhe Lidhjeve Blagoj Boçvarski tha se dokumentacioni i projektit është gati, por ndërtimi do të fillojë kur të sigurohen paratë.

Lidhja hekurudhore me Shqipërinë është veçanërisht e rëndësishme për ekonominë, e cila prej vitesh paralajmëron se nevojitet një lidhje më e mirë me portin e Durrësit. Kjo bëhet veçanërisht e rëndësishme gjatë protestave të ndryshme, qoftë në kufirin e Greqisë, qoftë pranë portit të Selanikut, kur jemi dëshmitarë të kolonave të kamionëve të bllokuar që transportojnë produkte të ndryshme, apo derivate të naftës.

Në vitin 2019 u njoftua gjithashtu se hekurudha që do të lidhë hekurudhën e Manastirit me Greqinë është gati dhe se aty së shpejti do të kalojë treni i parë. Njoftimi i fundit nga fillimi i vitit është se nga 1 shkurti do të fillojë të qarkullojë një tren pasagjerësh në trasenë nga Manastiri në Zhabeni. Komuna e Manastirit njoftoi se hekurudha nuk do të përdoret për komunikacion ndërkombëtar, por treni do të transportojë udhëtarë nga qyteti poshtë Pelisterit deri në zonën industriale “Zhabeni” ku operon fabrika “Kromberg dhe Schubert” dhe prodhohen pjesë veturash.(PRESSonline.al)