Bekteshi në Konferencën e Parë të Infrastrukturës Rrugore: Një industri konkurruese e ndërtimit është një shtytës i rritjes ekonomike të vendit

“Edhe pse Ministria e Transportit dhe Lidhjeve është institucioni kompetent për ndërtim, Ministria e Ekonomisë ka një rol shumë të rëndësishëm në fushën e produkteve të ndërtimit, të cilat janë element kyç i ndërtimit, si dhe në fushën e efiçiencës energjetike të ndërtesave, për të cilën të gjithë kemi parë është një prioritet i politikave të BE-së. Një mekanizëm efikas dhe i fortë për të kontrolluar cilësinë e materialeve të ndërtimit të ofruara në treg është një nga parakushtet më të rëndësishme që duhet të ofrojë garanci shtesë për sigurinë e ndërtimeve dhe rritjen e qëndrueshme të industrisë vendase të ndërtimit.

Industria e ndërtimit është një shtytës i rëndësishëm i zhvillimit ekonomik të vendit. Për shkak të rëndësisë që ka, është mirë që kjo degë e industrisë të mbështetet në kompani të forta që kanë kapacitete, njohuri dhe përvojë të madhe dhe që vazhdimisht investojnë në prodhimin e materialeve cilësore të ndërtimit”, tha ministri i Ekonomisë Kreshnik
Bekteshi në Konferencën e Parë për Infrastrukturë rrugore e cila mbahet në Ohër.

Ministri Bekteshi, i cili ishte folës në panelin me temë “Roli i ndërtimit në zhvillimin ekonomik të vendit”, tha se Ministria e Ekonomisë në vitin 2021 ka miratuar Ligjin e ri për produktet e ndërtimit, i cili është plotësisht në përputhje me Rregulloren 305/ 2011 të Bashkimit Evropian dhe kontribuon në thjeshtimin e procedurave administrative, shkurtimin e kohës për marrjen dhe emërimin e organeve dhe është në funksion të rritjes së efikasitetit të kontrolleve dhe shuarjes së të gjitha barrierave teknike dhe tregtare në këtë fushë.

Në fjalën e tij, ministri iu referua kohës kur kompanitë vendore të ndërtimit ishin ndërtuesit më të mëdhenj të infrastrukturës në vendet e rajonit dhe më gjerë.
“Ne kemi nevojë për një strategji që do të tregojë nëse vërtet duam të ndërtojmë infrastrukturë të qëndrueshme. Kompanitë tona tani punojnë më pak në tregjet e huaja dhe kjo është humbje edhe për shtetin. Prandaj duhet të punojmë të gjithë bashkë dhe kompanitë e ndërtimit duhet të punojnë bashkë për të qenë konkurrues”, tha ministri.

Ministri theksoi se sektori i ndërtimit është i rëndësishëm për ekonominë dhe kontribuon me 5% në Prodhimin e Brendshëm Bruto (PBB).

“Nevojitet konkurrencë më e madhe dhe zhvillim i vazhdueshëm sipas tendencave dhe kërkesave të reja teknologjike që lidhen me Agjendën e Gjelbër, duke përfshirë transformimin e gjelbër, efikasitetin e energjisë, ekonominë rrethore dhe përdorimin e mbetjeve të ndërtimit, si dhe inkurajimin e transformimit dixhital në ndërtim, investimet në kërkim dhe zhvillim dhe aftësitë, për zhvillimin e materialeve të qëndrueshme si bazë solide për zgjidhje të qëndrueshme dhe inteligjente në ndërtim dhe materiale ndërtimi”, tha ministri Bekteshi.