Komuna e Butelit dhe qyteti i Shkupit ia hedhin përgjegjësinë njëra – tjetrës për urën në Vizbegovë, për të cilën QMK ka paralajmëruar se është e rrezikshme për lëvizje
Për rehabilitimin e mbikalimit në Vizbegovë është i obliguar Qyteti i Shkupit, kështu u konstatua në mbledhjen e sotme në Qendrën për Menaxhim me Kriza. Në mbledhje folën përfaqësues nga Ministria e Transportit dhe Lidhjeve, Ministria e Punëve të Brendshme, Këshilli Republikan për Siguri në Komunikacion dhe Komuna e Butelit.
“Në këtë takim u konstatua se mbi këtë urë juridiksion ka qyteti i Shkupit. Konkretisht nga Ministria e Transportit dhe Lidhjeve është theksuar se me vendim të caktuar të Qeverisë, ky lloj mbikalimi mbi rrugët kryesore bie nën juridiksionin e qytetit të Shkupit”, thotë Darko Kostovski, kryetar i Komunës së Butelit, përcjell PRESSonline.al
Edhe pse ishin të ftuar, përfaqësuesit e qytetit të Shkupit nuk morën pjesë në takim. Tellma kërkoi përgjigje prej tyre se kur do të nisin rehabilitimin e mbikalimit dhe përgjigja ishte se për mbikalimin është përgjegjëse Komuna e Butelit.
“Ligji për rrugët publike parashikon se: Rruga komunale është rrugë publike që lidh zonat e banuara dhe është e rëndësishme për qarkullim në komunë. Ligji parashikon se: “Objektet e rrugëve publike” janë: urat, nënkalimet, mbikalimet, kanalet, tunelet, galeritë, strukturat mbështetëse, nëntoka dhe mbikalimet, objektet e mbledhjes së pagesave rrugore dhe të ngjashme. Për këto arsye, pasi që mbikalimi i rrjetit dytësor të trafikut lidh zonat e banuara në territorin e Komunës dhe është nën juridiksionin e Komunës Butel. Deri më sot nuk është bërë asgjë nga Komuna e Butelit në lidhje me këtë mbikalim”, thuhet në përgjigjen nga Qyteti i Shkupit.
Drejtori i QKM-së, i cili ngriti alarmin për problemin dje, beson se e vetmja zgjidhje e përkohshme, derisa të vendoset se kush është përgjegjës për rehabilitimin e mbikalimit, është ndalimi i kalimit të mjeteve të rënda.
“Kam kontaktuar me sekretarin e përgjithshëm të Qytetit, Zoran Gligorov, i cili më ka shpjeguar se nuk kanë juridiksion mbi mbikalimin në Vizbegovë. Na kanë dërguar edhe një deklaratë ku i referohen ligjit dhe pretendojnë se nuk janë kompetentë. Në të njëjtën kohë, përfaqësuesit e Komunës së Butelit pohojnë se nuk janë kompetentë, thotë Stojançe Angellov, drejtor i Qendrës për Menaxhim me Kriza, përcjell PRESSonline.al
Me kërkesë të Angellovit, Komuna e Butelit sot ka hequr blloqet e betonit që ishin të shpërndara në mbikalim dhe përbënin rrezik për qytetarët që kalojnë nën të me veturat e tyre. Bashkë me ta u hoqën edhe plehrat që ndodheshin dje. Ura është pastruar, por dridhjet kur kalon një automjet mbetën.
