Kosovë/ Autobusi doli nga rruga, 22 udhëtarë kërkojnë ndihmë mjekësore

22 persona kanë mbetur të lënduar pasi një autobus ka përfunduar jashtë rrugës tek vendi i quajtur “Kroi i Mbretit” në afërsi të Parkut të Biznesit, magjistralja Prishtinë-Pejë.

Të lënduarit kanë marrë trajtim në Klinikën Emergjente në QKUK. Drejtori i kësaj klinike, Naser Syla, ka thënë se gjendja e tyre është stabile.

“22 qytetarë kanë marrë trajtim në Klinikën Emergjente në QKUK. Gjendja e tyre është stabile dhe pas ekzaminimeve, të njëjtit janë liruar për në shtëpi”, ka thënë Syla.

Të mërkurën u raportua edhe për një kamion që kishte devijuar nga rruga te Liqeni i Badocit.