Raporti i inteligjencës amerikane: Izraeli gati për të sulmuar Iranin në muajt e ardhshëm

Izraeli do të ishte gati të sulmonte Iranin në muajt e ardhshëm: Mundësia e hapjes së një fronti të ri në Lindjen e Mesme është përmendur në një raport të Inteligjencës amerikane që u bë i njohur mbrëmë nga Wall Street Journal dhe më pas nga Washington Post.

Sipas raportimit të të dy gazetave, në javët e fundit të Administratës Biden, shërbimet sekrete të SHBA-ve dërguan në Shtëpinë e Bardhë një analizë ku shpjegohej se Izraeli e konsideron momentin të përshtatshëm për të sulmuar Teheranin.

Dobësimi i aleatëve të vendit shiit, me Hezbollahun e dëmtuar në Liban dhe Bashar al-Assadin të dëbuar nga Siria, do të ishte sipas izraelitëve momenti më i mirë për të goditur një herë e përgjithmonë programin bërthamor iranian, që për Izraelin përbën kërcënimin kryesor për sigurinë e tij kombëtare.

Raporti gjithashtu iu paraqit edhe Administratës Trump sapo kjo u fut në detyrë.

Sipas gazetave amerikane, koha e mundshme për sulmin do të ishte përcaktuar duke llogaritur se Administrata Trump do të ishte më e gatshme për veprime sesa ajo e Biden.

Gjatë vitit të fundit të mandatit të tij, megjithëse vazhdoi të furnizonte qeverinë e Benjamin Netanyahu me armë dhe municione që më pas u përdorën në Gaza, Biden shpesh e kishte ndaluar aleatin e tij në planet për të sulmuar drejtpërdrejt Teheranin.

Dëshira për të sulmuar drejtpërdrejt Iranin për të ndaluar programin bërthamor ka qenë një temë diskutimi në publikun izraelit për muaj me radhë dhe ka gjetur mbështetje nga disa grupe politike që gjithashtu kanë distancuar veten nga mënyra se si u zhvillua lufta në Gaza.

Po ashtu, edhe në javët e fundit, ministri i Mbrojtjes, Izrael Katz, u kthye në kërcënimin e Teheranit: “Irani është më i ekspozuar se kurrë. Kemi mundësinë të eliminoni kërcënimin ekzistencial ndaj shtetit të Izraelit që përfaqëson programi i tij bërthamor”, tha ai në nëntor.

Qeveria izraelite nuk ka reaguar ndaj zbulimeve të dy gazetave amerikane.

Përgjigja e Teheranit ndaj raportit të publikuar në mediat amerikane nuk ka vonuar.

Presidenti Masoud Pezeshkian ka premtuar se në rast sulmi nga “armiqtë” ndaj impianteve bërthamore të Teheranit, Republika do të ndihmonte në ndërtimin e 1000 impianteve të reja.