Qeveria i verifikojë dhe tha se dokumentet e LSDM-së për Mexhitin nuk janë të sakta

Qeveria i ka shqyrtuar dhe i ka hedhur poshtë pretendimet e paraqitura nga LSDM në lidhje me punën e ministrit të Mjedisit dhe zëvendëskryeministrit Izet Mexhiti.

“Mbikëqyrja inspektuese e kryer nga Inspektorati Administrativ ka të bëjë me aspektet e arkivimit dhe nuk ka konstatuar shkelje ligjore. Kjo praktikë administrative është vendosur që në vitin 2017 dhe është zbatuar vazhdimisht nën drejtimin e ministrave nga LSDM dhe BDI në qeveritë e mëparshme. Nëse sipas logjikës së Kuzevskës kjo përbën shkelje të ligjeve, atëherë do të thotë se ligji është shkelur nga qeveria e LSDM dhe BDI,” njoftoi Qeveria, duke i cilësuar si të pavërteta dhe spekulime pretendimet e LSDM-së.

Pak para këtij njoftimi, zëdhënësja e LSDM-së, Bogdanka Kuzevska, paraqiti dokumente për një punë të dyshimtë korruptive të zëvendëskryeministrit Izet Mexhiti dhe shprehu dyshime se ai kishte firmën e fundit në vendimet e Inspektoratit Shtetëror të Mjedisit, i cili jep leje për të gjitha projektet në vend, dhe jo Inspektorati.

Në dokumente përmendet se pas kontrollit të kryer, Inspektorati Shtetëror Administrativ urdhëron që vendimet e Inspektoratit të Mjedisit të kthehen menjëherë në arkiv dhe t’u dorëzohen palëve, në vend që fillimisht t’i dërgoheshin ministrit dhe pastaj palëve. Inspektorati Administrativ thekson se vendimet duhet të nënshkruhen nga drejtori i Inspektoratit Shtetëror të Mjedisit, jo nga ministri.

Megjithatë, kryeministri nuk e vuri në dyshim këtë çështje. Nuk dihet ende nëse Prokuroria do të reagojë ndaj këtyre pretendimeve të mbështetura me dokumente.

Kuzevska sot kritikoi qeverinë, duke theksuar se Inspektorati Shtetëror Administrativ ka konstatuar shkelje në punën e ministrit Mexhiti dhe se ai ka tejkaluar kompetencat e tij ligjore duke nënshkruar personalisht të gjitha çështjet.

“A ka dashur të vendosë kontroll dhe të krijojë hapësirë për shantazh ndaj kompanive dhe qytetarëve? Sipas këtyre dokumenteve, në Ministrinë e Mjedisit është vendosur një sistem i vendimmarrjes dhe nënshkrimeve në kundërshtim me ligjin dhe procedurat administrative, gjë që hap dyshime për korrupsion dhe ryshfet. Presim që Mickoski t’i lexojë dhe t’i shqyrtojë me kujdes këto dokumente dhe të përgjigjet për këto dyshime mbi abuzimet dhe mundësinë e korrupsionit. Le të shohim tani nëse kryeministri do të ndërmarrë ndonjë veprim me këto prova në dorë. A do të kërkojë nga institucionet kompetente të reagojnë, apo Mickoski do të vazhdojë ta mbrojë Izet Mexhitin,” tha zëdhënësja.