AUV: Produktet nuk do të dalin në treg nëse kanë mbetje pesticidesh

Importi i të gjitha dërgesave të ujit mineral burimor, si dhe pijeve freskuese me origjinë nga Kosova, është vendosur gjithashtu nën mbikëqyrje të zgjeruar inspektuese.

Kontrolle të forta për frutat dhe perimet e importuara kryhen nga Agjencia e Ushqimit dhe Veterinarisë. Synimi, sipas këtij institucioni, është sigurimi më i madh i ushqimit dhe arritja e një niveli të lartë të mbrojtjes së shëndetit të njeriut, në kushtet e intensifikimit të tregtisë së fruta-perimeve. Për këtë qëllim monitorohen dërgesat e këtij lloj produkti të importuar në vend nga të gjitha vendet.

“Kontrollet e zgjeruara do të zbatohen duke marrë mostra laboratorike për testimin e mbetjeve të pesticideve, duke përdorur metoda të akredituara, nga çdo dërgesë. Mostrat do të merren në pikat e inspektimit pas importit dhe dërgesat nuk do të lëshohen në qarkullim derisa të merret një rezultat që konfirmon sigurinë e produkteve”, thonë nga AUV.

AUV shton se për shkak të konstatimit laboratorik pozitiv për baktere koliforme në ujin mineral të burimeve me origjinë nga Kosova, që është në kundërshtim me dispozitat e Rregullores për kërkesat e veçanta të sigurisë për ujin mineral natyral, ujin e burimeve dhe ujin tjetër të ambalazhuar (“Gazeta Zyrtare e Republikës së Maqedonisë” nr. 184/20218), importi i të gjitha dërgesave të ujit mineral nga ky vend është vendosur nën mbikëqyrje të burimit.

“Dërgesat e pijeve joalkoolike me origjinë nga Kosova janë gjithashtu nën mbikëqyrje të zgjeruar inspektuese për sa i përket kritereve mikrobiologjike të sigurisë ushqimore, ku analizat laboratorike përcaktuan praninë e baktereve aerobe në një dërgesë. Për secilën nga dërgesat e mëposhtme të ujit të burimit dhe pijeve joalkoolike me origjinë nga Kosova, do të merren mostra laboratorike për testimin e mikroorganizmave në përputhje me Rregulloren për kërkesat e veçanta që kanë të bëjnë me kriteret mikrobiologjike për ushqimin”, deklaruan nga AUV.