“Nëse sulmoni njërin prej nesh, keni sulmuar të gjithë” – Von der Leyen paralajmëron masa kundër tarifave të Trump-it

Presidentja e Komisionit Evropian, Ursula von der Leyen, në një video-mesazh në disa gjuhë – anglisht, gjermanisht dhe frëngjisht – komentoi tarifat e reja të vendosura nga presidenti amerikan Donald Trump.

Sipas saj, masat tregtare të SHBA-së përbëjnë një goditje të rëndë për ekonominë botërore. Von der Leyen theksoi se Bashkimi Evropian po përgatit masa kundërpërgjigjeje nëse negociatat dështojnë.

“Po finalizojmë tashmë paketën e parë të masave kundërpërgjigjëse si reagim ndaj tarifave për çelikun. Përveç kësaj, po përgatisim masa të reja për të mbrojtur interesat dhe kompanitë tona, nëse negociatat nuk japin rezultat”, deklaroi Von der Leyen nga Samarkanda, Uzbekistan, ku mori pjesë në samitin për partneritetin mes BE-së dhe Azisë Qendrore.

Ajo paralajmëroi se pasojat e tarifave amerikane do të jenë të mëdha.

“Ekonomia globale do të pësojë dëme serioze, pasiguria do të rritet dhe kjo do të shkaktojë një valë të re proteksionizmi. Pasojat do të jenë të rënda për miliona njerëz në mbarë botën, veçanërisht për ekonomitë më të brishta, të cilat tani do të goditen nga tarifat më të larta amerikane. Qytetarët do të përballen me çmime më të larta për ushqimet, medikamentet dhe transportin. Inflacioni do të rritet”, shtoi Von der Leyen.

Presidentja e KE-së theksoi se të gjitha kompanitë, qoftë të mëdha apo të vogla, do të preken që nga dita e parë, për shkak të ndërprerjeve në zinxhirët e furnizimit, rritjes së pasigurisë dhe burokracisë shtesë.

Von der Leyen nënvizoi rëndësinë e një përgjigjeje të bashkuar evropiane.

“Nëse sulmoni njërin prej nesh, keni sulmuar të gjithë. Uniteti ynë është forca jonë”, theksoi ajo, duke shtuar se Evropa do të mbështesë të gjithë ata që do të preken drejtpërdrejt nga këto masa.

Ajo rikujtoi se Trump më herët kishte paralajmëruar vendosjen e një tarife minimale prej 10% për shumicën e produkteve të importuara në SHBA, ndërsa për Bashkimin Evropian kjo tarifë do të jetë më e lartë – 20%. Kjo e përkeqëson edhe më tej luftën tregtare globale, duke rritur rrezikun e inflacionit dhe ngadalësimin e rritjes ekonomike në SHBA dhe në botë.