Putin po afrohet në heshtje, Europa ngre alarmin: Pas Ukrainës, radhën e ka Finlanda

Ushtria ruse po zgjerohet në heshtje. Ky është alarmi që kanë ngritur tre vende kufitare me shtetin rus, Finlanda, Estonia dhe Letonia.

Informacioni vjen në mënyrë të detajuar nga prestigjiozja amerikane “Wall Street Journal”. Disa liderë europianë, edhe pse nuk janë shprehur publikisht, ndjehen të alarmuar për atë që ushtria ruse ka bërë përgjatë kufirit të saj me Evropën.

Rreth 100 milje në lindje të kufirit të saj me Finlandën, në qytetin rus të Petrozavodsk, inxhinierët ushtarakë po zgjerojnë bazat e ushtrisë ku Kremlini planifikon të krijojë një seli të re ushtrie për të mbikëqyrur dhjetëra mijëra trupa gjatë disa viteve të ardhshme. Këta ushtarë, shumë prej të cilëve shërbejnë në vijën e frontit në Ukrainë, synohen të jenë shtylla kurrizore e një ushtrie ruse që përgatitet të përballet me Organizatën e Traktatit të Atlantikut të Veriut, sipas zyrtarëve të ushtrisë dhe inteligjencës perëndimore.

Kremlini po zgjeron rekrutimin ushtarak, po forcon prodhimin e armëve dhe po përmirëson linjat hekurudhore në zonat kufitare.

Finlanda, e cila u detyrua t’i dorëzonte territoret Bashkimit Sovjetik në vitin 1940, ka kaluar dekada duke u përpjekur të shmangë konfrontimin me Moskën. Tani, pasi u bashkua me NATO-n pas pushtimit të Ukrainës, ajo po forcon kufirin e saj me mbrojtje elektronike dhe gardhe me tela me gjemba.

Trump, i cili i ka bërë presion Ukrainës që të pranojë një marrëveshje armëpushimi ndërsa përpiqet të rindërtojë lidhjet e SHBA me Kremlinin, ka thënë se shqetësimet se Rusia ka ndonjë ambicie përtej Ukrainës janë të tepruara. I pyetur në shkurt në lidhje me paralajmërimin e Presidentit ukrainas Volodymyr Zelensky se Rusia mund të bëjë luftë kundër NATO-s nëse SHBA zvogëlon mbështetjen për Aleancën, Trump tha: “Unë nuk jam dakord me këtë, aspak”.

Ekspertët ushtarakë brenda Rusisë e karakterizojnë aktivitetin përgjatë kufirit finlandez si pjesë e përgatitjes së Kremlinit për konflikt të mundshëm me NATO-n.

“Kur trupat të kthehen [nga Ukraina], ata do të shikojnë përtej kufirit një vend që ata e konsiderojnë kundërshtar”, tha Ruslan Pukhov, drejtor i Qendrës për Analizën e Strategjive dhe Teknologjive, një institut i mbrojtjes me bazë në Moskë. “Logjika e dekadës së fundit tregon se ne po presim një konflikt me NATO-n”.

Zyrtarët rusë kanë dërguar sinjale të ndryshme. Në një takim të Ministrisë së Mbrojtjes në fund të vitit të kaluar, ministri rus i Mbrojtjes, Andrey Belousov, tha se ushtria ruse duhet të jetë gati për një konflikt me NATO-n. Në të njëjtin takim, Presidenti Vladimir Putin tha se Perëndimi po alarmonte popullsinë e vet duke sugjeruar se Rusia ishte gati për të sulmuar dhe se tensionet aktuale po bënte NATO.

Ndërsa Rusia përgatitet të rrisë praninë e saj ushtarake përgjatë krahut lindor të NATO-s, Putin ka urdhëruar ushtrinë të zgjerojë radhët e saj në deri në 1,5 milionë trupa, nga rreth një milion para pushtimit të Ukrainës. Rusia ka rritur shpenzimet ushtarake në më shumë se 6% të PBB-së këtë vit, nga 3,6% para luftës. Për krahasim, SHBA-ja shpenzoi 3,4% të PBB-së së saj për ushtrinë e saj vitin e kaluar dhe vendet e BE-së, mesatarisht, shpenzuan 2,1%