Rubio: Pa u takuar Trump dhe Putin nuk merr fund lufta në Ukrainë

Sekretari amerikan i Shtetit, Marco Rubio, tha të enjten se mënyra e vetme që mund të çojë në një përparim në përpjekjet për të përfunduar luftën e Rusisë në Ukrainë do të ishte përmes bisedimeve direkte mes Presidentit Donald Trump dhe Presidentit rus Vladimir Putin, pasi Moska dërgoi një ekip të nivelit të dytë për bisedimet në Turqi.

Rubio, i cili foli për gazetarët në Antalya, tha se do të udhëtonte për në Stamboll të premten për takime me Ministrin e Jashtëm turk, Hakan Fidan, dhe një delegacion ukrainas, por tha se nuk kishte pritshmëri të larta për bisedimet.

“Nuk mendoj se do të kemi një përparim këtu derisa presidenti (Trump) dhe presidenti Putin të ndërveprojnë drejtpërdrejt për këtë çështje”, tha Rubio, duke përsëritur komentet e mëparshme të Trump.

Diplomati më i lartë amerikan e përshkroi gjendjen aktuale të bisedimeve për të përfunduar luftën si një “ngërç”, dhe tha se Trump ishte i vetmi person që mund të e çlironte atë.

Presidenti ukrainas, Volodymyr Zelenskiy, kishte udhëtuar në Turqi pasi Putin propozoi bisedime atje, para se presidenti rus të vendoste të mos udhëtonte vetë për në bisedime. Në vend të tij, Putin dërgoi një ekip të nivelit të dytë të ndihmësve dhe zëvendësministrave në Stamboll.

Rubio tha se niveli i zyrtarëve të dërguar nga Rusia nuk ishte tregues i një përparimi, por tha se Trump ishte i gatshëm të qëndronte me bisedimet sa herë që të ishte e nevojshme për të arritur paqen.

Kur u pyet nëse po ndërmerren ndonjë përpjekje për të bashkuar Trump dhe Putin, Rubio tha se Trump do të merrte vendime pasi të përfundojë udhëtimi i tij në Lindjen e Mesme.

“Ndoshta do të presim derisa ai të mbarojë me udhëtimin e tij… Do të presim të shohim se çfarë ndodh nesër, dhe atëherë do të merren vendimet për një afat kohor”, tha ai.