4450 libra për nxënësit e Tetovës – Bilall Kasami: “Kjo është një investim në dijen dhe të ardhmen!”

Kryetari i Komunës së Tetovës, Bilall Kasami, ka shpërndarë sot 4450 lektyra shkollore në bibliotekat e pesë shkollave të mesme të qytetit. Librat përfshijnë 62 tituj të ndryshëm të përzgjedhur nga programi mësimor dhe kanë për qëllim lehtësimin e qasjes së nxënësve në literaturën e detyrueshme shkollore.

Në një postim në rrjetet sociale, Kasami theksoi se ky nuk është vetëm një akt shpërndarjeje librash, por një investim i drejtpërdrejtë në dijen, në rininë dhe në të ardhmen e Tetovës. “Besojmë se çdo nxënës duhet të ketë mundësi të barabartë për të lexuar, mësuar dhe ëndërruar më shumë”, shkruan ai.

Ai falënderoi stafin komunal, drejtorët e shkollave dhe ekipin organizativ për angazhimin dhe përkushtimin e treguar, duke theksuar se: “Tetova që duam, ndërtohet me libra, me dije dhe me dashuri për brezat që vijnë!”.