Pamje: Shuplaka e gruas në fytyrën e Macronit, Pallati Elysee del me një sqarim

Zyra e presidentit francez, Emmanuel Macron, të hënën minimizoi një incident në të cilin bashkëshortja e tij, Brigitte, u duk sikur e shtyu atë në fytyrë, kur çifti arriti në Vietnam në fillimin e një vizite në Azinë Juglindore.

Në një video, Brigitte Macron u duk sikur i dha një shuplakë bashkëshortit para se ai të zbriste nga aeroplani të dielën vonë, duke e nxitur që të tërhiqej para se të bënte gjest të përshëndetjes para kamerave te dera e aeroplanit, raporton agjencia e lajmeve “Reuters”.

Bashkëshortja e presidentit për ca çaste nuk u duk te dera e aeroplanit, duke e pamundësuar pamjen e gjuhës së trupit. Më pas, çifti zbriti shkallëve të aeroplanit bashkë.

Një zyrtar i Pallatit Elysee e minimizoi skenën, duke mohuar se ajo paraqet një grindje mes çiftit, që janë të martuar nga viti 2007.

“Ishte një moment, kur presidenti dhe gruaja e tij po relaksoheshin për herë të fundit para fillimit të udhëtimit duke pasur një të qeshur” – tha zyrtari. “Ishte një moment afërsie” – shtoi ai.

Vizita e Macronit në Vietnam, e para nga një president francez për gati një dekadë, vjen në kohën kur ai po synon që ta fuqizojë ndikimin e Francës në ish-koloninë franceze.

Vietnami, vend që ka ekonomi të varur shumë nga eksporti, ka bërë koncesione me Shtetet e Bashkuara gjatë bisedimeve tregtare në përpjekje për ta shmangur taksën 46 për qind. Megjithatë, Brukseli ka shqetësime se përpjekjet e Vietnamit për të blerë më shumë mallra amerikane mund të jenë në dëm të Evropës.