Rod Stewart anulon koncerte të tjera për shkak të sëmundjes: Ende po shërohem, jam i shkatërruar

Këngëtari legjendar britanik Rod Stewart (80) është detyruar të anulojë ose të shtyjë gjithsej gjashtë koncerte të planifikuara për muajin qershor, për shkak të problemeve shëndetësore. Fillimisht, ai njoftoi anulimin e dy koncerteve me rekomandim të mjekëve, por më pas vendosi të shtyjë edhe katër të tjera ndërsa vazhdon rikuperimin nga gripi.

“Më duhet të anuloj dhe të shtyj gjashtë koncertet e ardhshme në qershor, pasi ende po rikuperohem nga gripi,” shkroi Stewart në një postim në rrjetet sociale. “Më vjen shumë keq, miqtë e mi. Jam i mërzitur për këtë dhe u kërkoj ndjesë të sinqertë fansave të mi për çdo shqetësim. Do të rikthehem në skenë së shpejti – shihemi aty!”.

Rod u shfaq për herë të parë në rrjetet sociale javën e kaluar për të njoftuar anulimin e koncertit të tij në Las Vegas për shkak të gjendjes shëndetësore. Dy ditë më vonë, ai u detyrua të anulojë edhe performancën e planifikuar për 5 qershor në të njëjtin vend.

“Mjeku më këshilloi të pushoj edhe pak, derisa të rikuperohem plotësisht nga gripi. Faleminderit për dashurinë dhe mirëkuptimin,” shtoi ai.

Anulimi i koncerteve pak javë para paraqitjes së shumëpritur në festivalin Glastonbury në Somerset, më 29 qershor, ka shkaktuar shqetësim te fansat që presin me padurim performancën e tij në këtë ngjarje të madhe muzikore.

Sir Rod ka ndarë disa detaje për atë që publiku i Glastonbury dhe shikuesit në BBC mund të presin nga shfaqja e tij, përfshirë një ribashkim emocionues në skenë me ish-anëtarin e grupit Faces, Ronnie Wood – i njohur edhe si anëtar i The Rolling Stones.

“Jam krenar që pas 22 vjetësh po kthehem në Pyramid Stage. Por, kjo do të më kushtojë goxha – rreth 300 mijë paund”, deklaroi Rod gjatë një interviste në emisionin talkSPORT Breakfast me Alan Brazil. “Duhet ta sjell gjithë bendin tim nga Amerika, dhe Glastonbury, natyrisht, nuk e mbulon këtë”.

Megjithatë, ai theksoi se çmimi nuk e pengon aspak: “Edhe po të kushtonte një milion dollarë, do të performoja. Sepse është një nder i madh. Ndoshta nderi më i madh i karrierës sime”,

Në një tjetër postim, ai shkroi me optimizëm: “Pas kaq shumë vitesh, jam krenar, i përgatitur dhe më i gatshëm se kurrë të ngjitem në skenë dhe të gëzoj miqtë e mi në Glastonbury këtë qershor. Shihemi atje!”.