“Policia britanike befasohet nga vend-fshehja e drogës – shqiptari përfundon në burg”

Një 25-vjeçar shqiptar, i identifikuar si L.P., është dënuar me dy vite e nëntë muaj burg nga Gjykata e Kurorës në Stafford, Mbretëria e Bashkuar, pasi u kap me drogë të klasit A të fshehur në mënyrë të pazakontë – brenda enëve të vazelinës.

I riu, pa adresë të përhershme, u arrestua më 14 maj në qytetin Tamworth, gjatë një kontrolli të rastësishëm të automjetit që po drejtonte. Gjatë kontrollit, policia e Staffordshire zbuloi tre enë me vazelinë që përmbanin kokainë, një telefon celular dhe 620 paund para të gatshme.

Ai u përball me akuza për:

posedim me qëllim shpërndarjeje të drogës së klasit A,

posedim të pasurisë kriminale,

drejtim automjeti pa leje të vlefshme,

përdorim të automjetit pa sigurim nga një palë e tretë.

Gjykata urdhëroi gjithashtu konfiskimin e shumës së parave të sekuestruara në vendngjarje.

Policia e Staffordshire theksoi se vijon fushatën për të luftuar krimin e organizuar në rajon dhe se që nga maji i vitit 2023 janë arrestuar mbi 1,000 persona për vepra penale të lidhura me drogën dhe armët.