Protesta me tensione në Serbi – deputet rrihet brutalisht nga disa persona të maskuar

Mbrëmë në mbarë Serbinë u mbajtën protesta të reja, të shënuara me tensione të larta dhe një sërë incidentesh. Në Beograd, pranë ndërtesës së Shtabit të Përgjithshëm, mbështetësit e Partisë Progresive Serbe (SNS) lëshonin vazhdimisht mjete piroteknike drejt kordonit të xhandarmërisë dhe drejt qytetarëve. Sulme të ngjashme u regjistruan edhe në pjesë të tjera të qytetit, ndërsa policia përdori gaz lotsjellës ndaj protestuesve. Gaz lotsjellës u përdor edhe në Novi Sad dhe disa qytete të tjera.

Partia për Liri dhe Drejtësi (SSP) publikoi në platformën X se deputeti i saj, Pegja Mitroviç, është rrahur brutalisht gjatë protestës në Beograd. Në njoftim thuhet se “koka e tij u shtyp nga dhunuesit e Partisë Progresive Serbe”, se “u godit me shufër në kokë dhe disa herë në trup” dhe se “aktualisht është në rrugë për në spital”.

Mitroviç deklaroi se, pa asnjë arsye, u sulmua nga shtatë ose tetë persona të maskuar.
“U hodhën mbi mua, dhe kur u thashë se jam deputet, më thanë se nuk i interesonte dhe filluan të më godisnin brutalisht në kokë dhe në këmbë me shufra”, tha ai.
“Filluan të më keqtrajtonin dhe të më ofendonin. Kur kuptova se nuk e dinin fare se çfarë po bënin dhe se kjo mund të përfundonte shumë keq, u strehova dhe ika, sepse pashë që kisha të bëja me njerëz që qartazi kishin humbur arsyen”, shtoi Mitroviç.