Mucunski – Kos: Konfirmohet angazhimi dhe mbështetja për rrugën eurointegruese të vendit

Ministri i Punëve të Jashtme dhe Tregtisë së Jashtme, Timço Muçunski sot, në kuadër të vizitës së tij dyditore pune në Bruksel, realizoi takim me Komisioneren Evropiane për Zgjerim të Bashkimit Evropian, Marta Kos.

Siç informoi ministria e Punëve të Jashtme dhe Tregtisë së Jashtme, Mucunski dhe Kos theksuan mbështetjen e fortë për zgjerimin e Unionit, si nga vendet anëtare ashtu edhe nga qytetarët e Maqedonisë së Veriut, gjë që konfirmohet edhe nga gjetjet e “Eurobarometrit” të fundit.

Në takim u përshëndet qasja reformuese e Qeverisë, veçanërisht përmbushja e detyrimeve nga procesi i reformave dhe zbatimi i Planit të Rritjes. Ministri Mucunski theksoi se reformat që lidhen me integrimin evropian mbeten lart në agjendën politike të brendshme, me një fokus të fortë në sundimin e ligjit dhe luftën kundër korrupsionit.

Ministrja shprehu mirënjohje për angazhimin personal të Komisioneres Evropiane Kos në procesin e anëtarësimit, veçanërisht në kontekstin e pjesëmarrjes dhe mbështetjes së saj në Samitin për Planin për rritje, i cili u mbajt së fundmi në Shkup.

Bashkëbiseduesit këmbyen gjithashtu pikëpamje mbi anëtarësimin e fundit të vendit në SEPA, si dhe iniciativën për të hequr gradualisht shpenzimet e roamingut midis vendeve të Ballkanit Perëndimor dhe Bashkimit Evropian. Vendimi për këtë iniciativë pritet në fillim të vitit 2026, si pjesë e përfitimeve të integrimit gradual në Union.

Në takim u diskutua gjithashtu për zhvillimet aktuale rajonale dhe globale, duke konfirmuar mbështetjen e ndërsjellë për Ukrainën dhe angazhimin për arritjen e një paqeje të drejtë dhe të qëndrueshme sa më shpejt të jetë e mundur.