Rusët filmuan momentin e sulmit ndaj anijes luftarake ukrainase (VIDEO)

Rusët filmuan momentin e sulmit ndaj anijes luftarake ukrainase (VIDEO)

Numri i të vdekurve nga sulmi rus ndaj një anijeje luftarake ukrainase është rritur në dy, tha zëdhënësi i Marinës Ukrainase, Dmytro Pletenchuk, në televizionin kombëtar.

Ka të lënduar dhe disa marinarë rezultojnë të zhdukur. Një operacion kërkim-shpëtimi është duke u zhvilluar. “Por shumica e ekuipazhit është i sigurt që nga dje,” tha Pletenchuk. Ukrainasit ngurrojnë të diskutojnë detajet e sulmit, siç është koha dhe vendi ku ndodhi.

Ministria ruse e Mbrojtjes tha dje se anija ukrainase e zbulimit Simferopol u godit nga një dron pranë grykëderdhjes së lumit Danub dhe u fundos. Kur u pyet për fundosjen, Pletenchuk tha se “nuk mund ta konfirmojë këtë informacion”.

Pamjet video të sulmit ndaj anijes u shfaqën në mediat ruse.

Eksperti rus i dronëve, Denis Fedutinov, i tha agjencisë shtetërore ruse të lajmeve Tass se kjo është hera e parë që forcat ruse kanë fundosur një anije luftarake ukrainase duke përdorur një dron.

“Ky është rasti i parë i konfirmuar zyrtarisht nga Ministria Ruse e Mbrojtjes, ku një anije luftarake ukrainase është goditur nga një dron rus. I vetmi incident tjetër i rëndësishëm që përfshin përdorimin e një droni ushtarak nga ushtria ruse ishte një shpërthim pranë njërës prej urave që kalojnë lumin Dniepër”, tha Fedutinov.

Simferopol është një anije zbuluese e klasit Laguna e Marinës Ukrainase. Ajo u lançua në vitin 2019 dhe u bashkua zyrtarisht me flotën dy vjet më vonë. Anija është projektuar për zbulim radiofonik, elektronik, radar dhe optik dhe është e armatosur me një sistem artilerie AK-306 30 mm.