Ukraina gjen gjurmë ruse në vrasjen e politikanit Andriy Parubiy

Një i dyshuar për vrasjen me armë zjarri të politikanit të shquar ukrainas dhe ish-kryetarit të parlamentit Andriy Parubiy është ndaluar, njoftoi të hënën presidenti Volodymyr Zelensky.

“I dyshuari ka dhënë një dëshmi fillestare. Veprime urgjente hetimore janë duke u zhvilluar aktualisht për të përcaktuar të gjitha rrethanat e kësaj vrasjeje”, tha Zelensky në X.

“Veprimet urgjente hetimore janë duke u zhvilluar aktualisht për të përcaktuar të gjitha rrethanat e kësaj vrasjeje. I gjithë ekipi i zbatimit të ligjit dhe prokurorët po punojnë pa ndërprerje”, shpjegoi ai.

Kreu i Shërbimit të Sigurisë së Ukrainës (SBU) në rajonin e Lvivit, Vadym Onyshchenko, tha: “Krimi ka shenja të një vrasjeje me kontratë”.

“Ka informacione operative që tregojnë përfshirjen e mundshme të shërbimeve speciale të Federatës Ruse në organizimin e vrasjes”, shtoi ai.

Parubiy, një politikan ukrainas i cili më parë shërbeu si kryetar i parlamentit, u qëllua për vdekje në Lviv të shtunën.

Gjatë një konference për shtyp në Lviv, zyrtarët e policisë thanë se Parubiy u qëllua tetë herë me një armë zjarri me tytë të shkurtër. Shtatë gëzhoja u gjetën në vendin e krimit.

Një sulmues ishte maskuar si korrier dhe menjëherë u nis një kërkim mbarëkombëtar.

Zyra e Prokurorit të Përgjithshëm tha se një 52-vjeçar banor i Lvivit u akuzua për vrasjen e Parubiy.

Ministri i Brendshëm, Ihor Klymenko tha se një i dyshuar u arrestua në rajonin Khmelnytskyi.

Shefi i policisë ukrainase Ivan Vyhivskyi tha gjithashtu se krimi nuk ishte “i rastësishëm” dhe kishte “një gjurmë ruse”.

Vyhivskyi ndau më shumë detaje në Facebook, duke thënë se i dyshuari kaloi shumë kohë “duke u përgatitur, duke parë, planifikuar dhe më në fund duke tërhequr këmbëzën”.

“I maskuar si korrier, ai hapi zjarr ndaj (Parubiy) në mes të ditës. Tetë të shtëna. Mizori gjakftohtë. Ai madje u sigurua që viktima të ishte e vdekur”, shkroi Vyhivskyi.

Autoritetet e zbatimit të ligjit thanë se po hetojnë nëse Parubiy mori kërcënime para vdekjes së tij. Parubiy ishte një aktivist i njohur dhe një politikan i shquar ukrainas.

Ai u bë për herë të parë anëtar i parlamentit të Ukrainës në vitin 2007 dhe fitoi famë gjatë Revolucionit të Dinjitetit të Ukrainës, i njohur si EuroMaidan, në vitin 2014.

Parubiy udhëhoqi grupet vullnetare të vetëmbrojtjes gjatë protestave mbarëkombëtare, të cilat kërkuan lidhje më të ngushta me Bashkimin Evropian, duke çuar përfundimisht në rrëzimin e presidentit pro-rus Viktor Janukovych.