Osmani: Leje falas për vozitje për të rinjtë më të mirë në Çair

Në Çair u hap një kapitull i ri i shpresës dhe përfshirjes rinore. Kandidati për kryetar të komunës Bujar Osmani e lansoi projektin “Ti flet, Çairi ndryshon: Kutia e problemeve në Çair”; një nismë që synon t’i japë zë të rinjve me ide, propozime dhe vizione për komunën.

“47% e qytetarëve të Çairit janë nën moshën 30 vjeçare. Kjo është një forcë e jashtëzakonshme, një energji që duhet kanalizuar në mënyrë institucionale. Ne nuk duam që rinia të ndihet e lënë pas dore, por të bëhet pjesë aktive e vendimmarrjes në komunë”, tha Osmani.

Propozimi kryesor ishte që komuna e Çairit do të mbulojë shpenzimet për patentë shoferët për të rinjtë më të dalluar.
“Për studentët me notë mesatare 10.00; për ata që do të fitojnë vendin e parë, të dytë ose të tretë në garat republikane; si dhe për të rinjtë që do të marrin shpërblime ndërkombëtare, komuna do të mbulojë të gjitha shpenzimet për marrjen e patentë shoferit. Ky është mesazhi ynë: suksesi shpërblehet, mundi njihet, e rinia ka përkrahjen e komunës së saj”, theksoi Osmani.

Në kuadër të projektit, ai paralajmëroi edhe hapjen e Qendrës Rinore Multifunksionale në Sheshin Skënderbe; krijimin e një fondi për inovacion; si dhe bursa për studentët më të talentuar. Përmes kutisë së problemeve dhe platformës digjitale, të rinjtë do të kenë mundësi të japin idetë e tyre për projekte konkrete që komuna do t’i mbështesë.

“Ky nuk është vetëm një projekt elektoral; është një lëvizje gjithëpopullore e shpresës. Jemi këtu për të dëgjuar zërin e rinisë, për t’i bërë ata pjesë të ndryshimit dhe për ta kthyer Çairin në model të bashkëjetesës dhe inovacionit”, përfundoi Osmani.