Eurodeputeti Weitz shpreson që pas zgjedhjeve lokale do të bëhen ndryshimet kushtetuese në Maqedoni

Qeveria e Maqedonisë, ngadalë por sigurt, po i zbaton agjendat që lidhen me pakicat, çështjet e sigurisë, korridoret dhe temat e tjera, duke shënuar njëfarë përparimi, por deri më tani ende mungon një hap i vërtetë përpara në rrugën drejt Bashkimit Evropian, deklaroi raportuesi i Parlamentit Evropian për vendin, eurodeputeti austriak Thomas Weitz.

– Maqedonia e Veriut ende është e bllokuar nga Bullgaria. Për fat të keq, ka shumë çështje që lidhen me identitetin të cilat e pengojnë përparimin e saj, theksoi Weitz në një deklaratë për Redaksinë Evropiane të Lajmeve (ENR).

Weitz shprehu shpresë se pas zgjedhjeve lokale do të bëhen “ndryshimet e nevojshme kushtetuese për përfshirjen e komunitetit bullgar në Kushtetutë si pakicë”.

– Kjo do ta hapë rrugën për fillimin e vërtetë të negociatave. Mendoj se vendi aktualisht është pjesë e procesit të anëtarësimit, por në fakt ende nuk i kemi filluar negociatat. Duhet t’i fillojmë së shpejti për ta mbajtur vendin në rrugën e duhur, shtoi Weitz.