Pas kontrollit në Qytetin e Shkupit për mbeturina, MPB: Dokumentacioni është siguruar dhe po merren masa

As sot nuk u mblodhën mbeturinat në qytetin e Shkupit. Mbeturinat po hidhen përreth koshave pasi ato janë të stërmbushura tashmë dy ditë. Njësia për Krime Ekonomike hyri brenda ambienteve të bashkisë së kryeqytetit dhe në NP Higjiena Komunale dhe siguroi dokumentacion si dëshmi se pse mbeturinat nuk po pastrohen.

“Njësia për Krime Ekonomike e Shërbimit Publik të Shkupit SPB hyri dje në ambientet e Qytetit të Shkupit dhe Ndërmarrjes Publike të Shërbimeve “Higjiena Komunale”, me urdhër të Prokurorisë Publike të Shkupit, me qëllim mbledhjen e provave dhe sekuestrimin e dokumentacionit përkatës mbi dyshimet për krime të kryera në lidhje me veprimtarinë e Ndërmarrjes Publike të Shërbimeve “Higjiena Komunale” dhe Kryetares së Qytetit të Shkupit në lidhje me mosmbledhjen e mbeturinave komunale. Dokumentacioni është siguruar dhe po ndërmerren masa dhe aktivitete shtesë sipas udhëzimeve të Prokurorisë Publike të Shkupit”, tha Goce Andreev, MPB.

Kryetarja e Qytetit të Shkupit në largim, Danella Arsovska, me anë të një postimi në facebook iu drejtua kryeministrit:

“Problemi me mbeturinat është çështje e mbyllur së bashku me stafin tuaj. Ju krijoni dhe vazhdimisht krijoni kaos, të cilin meqenëse jeni “të aftë” do ta “zgjidhni” në 72 orë. Le të konkludojmë se meqenëse po zgjidhet në 72 orë, ishte e lehtë për t’u zgjidhur, nuk e di çfarë prisnit deri tani, ju kam thirrur shumë herë në interes të qytetarëve për të bashkëpunuar”, theksoi Danella Arsovska, kryetare në largim e Qytetit të Shkupit.

Nga ana tjetër kryetari i sapo zgjedhu i Çairit Izet Mexhiti nëpërmjet kumtesës tha se për kaosin me mbeturinat në Shkup, do të mbajnë përgjegjësi BDI, Danella dhe Levica.