Trump kërcënon të ndërpresë fondet për Nju Jorkun nëse Mamdani bëhet kryetar bashkie

Presidenti i Shteteve të Bashkuara, Donald Trump, tha sot se mund të ndërpresë fondet federale për qytetin e Nju Jorkut nëse kandidati Zohran Mamdani fiton zgjedhjet për kryetar bashkie dhe tha se në vend të kësaj do të mbështeste ish-guvernatorin e Nju Jorkut, Andrew Cuomo, raportoi BBC.

Mamdani, një kongresmen 34-vjeçar nga Queens, ka propozuar politika për të përmirësuar strehimin dhe shërbimet publike, duke përfshirë kujdesin falas për fëmijët, ngrirjen e qirasë dhe autobusët falas të qytetit.

Trump e quajti atë “komunist” në një intervistë me CBS News dhe tha se ai ishte “shumë më i keq se një socialist”. “Nëse Mamdani bëhet kryetar bashkie, do të jetë e vështirë për mua t’i jap shumë para qytetit të Nju Jorkut. Nëse ke një komunist në pushtet, e tëra çfarë bën është të shpenzosh paratë që dërgon atje”, tha Trump.

Në të njëjtën kohë, Mamdani theksoi se Nju Jorku do të vazhdojë të marrë fonde federale sepse është një detyrim ligjor, jo një çështje e vullnetit të presidentit.

“Ne do të vazhdojmë të marrim fonde nga qeveria federale dhe kjo nuk është për shkak të bujarisë së Trump. Është sepse ligji e urdhëron këtë”, tha Mamdani.

Mamdani më parë paralajmëroi se kundërshtari i tij, ish-guvernatori i Nju Jorkut, Andrew Cuomo, do të ishte një “kukull e Trump” nëse ai fiton.

Nga ana tjetër, Cuomo pretendoi se Trump do të “marrë kontrollin” e Nju Jorkut dhe do të dërgojë ushtrinë në qytet nëse fiton Mamdani, gjë që presidenti amerikan e quajti “çmenduri”, raportoi Tanjug.

Trump deklaroi gjithashtu se, ndërsa nuk është një “fans” i Cuomo-s, nëse i jepet mundësia të zgjedhë midis një “demokrati të keq” dhe një komunisti, ai gjithmonë do të zgjedhë “demokratin e keq”.