Këto janë armët që po përdoren nga ushtria amerikane për të goditur “anijet e drogës”

Ushtria amerikane ka ndërmarrë një fushatë kundër anijeve të dyshuara për trafik droge në Oqeanin Paqësor dhe Detin e Karaibeve duke përdorur një sërë dronësh dhe avionësh luftarakë.

Shumica e sulmeve janë kryer duke përdorur dronë MQ-9 Reaper, thanë burimet për CNN, të cilët janë avionë të pilotuar nga distanca të përdorur nga ushtria dhe zakonisht janë të armatosur me raketa Hellfire. Sulme të tjera janë kryer nga avionë me pilot, duke përfshirë avionë luftarakë AC-130J, thanë burimet.

Deri më sot, Pentagoni nuk ka pranuar publikisht se çfarë avionësh ose pajisjesh po përdor ushtria për të kryer sulmet.

Që nga fillimi i shtatorit, ushtria amerikane ka vrarë 76 persona në 19 sulme që kanë shkatërruar 20 anije si pjesë e një fushate që Uashingtoni thotë se synon të kufizojë rrjedhën e drogës në Shtetet e Bashkuara.

Ushtria amerikane ka përqendruar shumë nga mjetet e saj në Porto Riko, duke përfshirë dronët MQ-9, avionët luftarakë F-35 dhe të paktën një luftanije AC-130J. Të gjitha kanë rreze veprimi të kufizuar dhe ka të ngjarë të përdoren për sulmet në Karaibe. CNN ka raportuar se luftanija u pa më 9 tetor e armatosur me raketa të drejtuara me precizion për të goditur objektiva tokësore, transmeton Klankosova.tv.

Javën e kaluar, një luftanije AC-130J e operuar nga Forcat Ajrore Amerikane u shfaq në El Salvador, në Vendndodhjen e Sigurisë Bashkëpunuese të SHBA-së (CSL) Comalapa, sipas fotove dhe imazheve satelitore të marra nga CNN.