Katër vjet burg për nënën që braktisi foshnjën gjashtëmuajshe të vetme në qendër të Velesit në temperaturë mbi 40 gradë celcius

Një grua nga Velesi ka marrë dënim me katër vjet burg pasi më 12 korrik të vitit të kaluar la foshnjën e saj gjashtëmuajshe vetëm në qendër të qytetit dhe u largua. Vendimi u dha nga Gjykata Themelore e Velesit, ku S. K. (22) u shpall fajtor për veprën penale “Braktisje dhe keqtrajtimi i fëmijës”, dhe është i formës së prerë.

Sipas aktakuzës, ajo me neglizhencë të rëndë ndaj detyrave të saj si prind la foshnjën e porsalindur në një bankë, në kushte të temperaturës mbi 40°C, e zhveshur, të uritur dhe të dehidratuar. Një kalimtar e gjeti foshnjën dhe e dërgoi në spitalin e Velesit, ku mjekët konstatuan kequshqyerje, peshë vetëm 4.6 kg, temperaturë të lartë, dehidrim, lëkurë dhe sy të thatë, diarre dhe sy të irrituar. Foshnja nuk kishte regjistrim emri dhe mbiemri, as nga libri i lindjeve dhe as dokument shëndetësor.

Në ditën pasuese, nëna u shfaq në spital dhe më pas u zhduk. Ajo u gjet dhe u arrestua më 23 gusht të vitit të kaluar. Analizat ADN konfirmuan se ajo ishte nëna biologjike e foshnjës. Foshnja u kujdes në Manastir nga Qendra ndër-komunale për punë sociale, pasi rezultoi se nëna banonte në Manastir.

Gjykata Themelore e Velesit ka dhënë më parë edhe një vendim të ngjashëm për një grua tjetër që la foshnjën e saj tre muajshe të vetme më 13 janar 2023 dhe u dënua fillimisht me katër vjet, pastaj me dy vjet burg pasi pranoi fajin në proces të ri gjyqësor.