LSDM: Pushteti synon kontroll të plotë – zgjedhja e ushtrueses së detyrës së prokurores është provë e re

“Pushteti i Mickoskit po nxiton ta vërë nën kthetrat e veta prokurorinë dhe gjyqësorin. Qëllimi është kontroll i plotë mbi prokurorinë dhe varrosja e drejtësisë, për t’u shpëtuar përgjegjësisë për tenderët kriminalë që zhvillohen pas shpinës së qytetarëve.

Zgjedhja e ushtrueses së re të detyrës së Prokurores Publike të Shtetit është edhe një dëshmi për këtë. Anita Topalova Isajllovska njihet si prokurore që kërkoi shfuqizimin e lëndës ‘Talir’, në të cilën ishte i akuzuar edhe Nikolla Gruevski, dhe që kishte të bënte me financimin e paligjshëm të VMRO-DPMNE-së,” thuhet në reagimin e sotëm të LSDM-së opozitare.
Nga partia shtojnë se “ajo është bashkëshorte e Ilija Isajllovskit, ish-zëvendësministër nga VMRO-DPMNE”.

“A është tani e qartë për të gjithë se çfarë po ndodh? Njësoj si në kohën e Gruevskit. Nuk do t’ju kalojë! Të gjithë do të mbani përgjegjësi! Puna nuk ka përfunduar!” theksojnë nga LSDM.