Më shumë se 200 civilë të vrarë në sulmet etnike në Sudan: Fëmijë midis viktimave

Më shumë se 200 civilë, përfshirë gra dhe fëmijë, janë vrarë në sulme të motivuara etnikisht nga Forcat paraushtarake të Mbështetjes së Shpejtë (RSF) në disa pjesë të rajonit Darfur të Sudanit, tha Rrjeti i Mjekëve të Sudanit, duke i përshkruar sulmet si një shkelje të rëndë të ligjit ndërkombëtar humanitar.

Duke cituar dëshmi nga të mbijetuarit që mbërritën në kampet për personat e zhvendosur në Tina, pranë kufirit sudanez-çad, organizata deklaroi se civilët u shënjestruan dhe u vranë në baza etnike në qytetet Ambro dhe Abu Kamra në Darfurin e Veriut, si dhe në Sirba në Darfurin Perëndimor, pas sulmeve nga forcat e RSF-së në ato zona, raporton Anadolu.

“Midis viktimave kishte fëmijë, gra dhe burra që u shënjestruan dhe u vranë qëllimisht për shkak të përkatësisë së tyre etnike”, thuhet në deklaratë, duke i përshkruar sulmet si një shkelje të rëndë të ligjit ndërkombëtar humanitar dhe të drejtave të njeriut.

Vrasjet u regjistruan në një kohë luftimesh të intensifikuara në Darfurin e Veriut.

Forcat e Përbashkëta të Lëvizjeve të Armatosura, të cilat janë aleate të ushtrisë sudaneze, njoftuan se kishin zmbrapsur sulmet e RSF-së në disa vende në atë pjesë të vendit të enjten.

Këto forca akuzuan RSF-në për përshkallëzim, siç thanë ato, të sulmeve kriminale ndaj civilëve të paarmatosur, veçanërisht në dhe përreth Abu Kamra-s, me qëllim vendosjen e dhunshme të kontrollit përmes vrasjeve, zhvendosjes me forcë dhe frikësimit të popullsisë dhe personave të zhvendosur që kishin ikur nga El Fasher.

Sipas Forcave të Përbashkëta, që nga fillimi i ofensivës, luftëtarët e RSF-së kanë djegur fshatra të tëra, kanë plaçkitur bagëti dhe pronë civile, dhe kanë kryer, siç u tha, shkelje të rënda të të drejtave të popullsisë vendase.

Konflikti midis ushtrisë sudaneze dhe RSF-së, i cili shpërtheu në prill të vitit 2023, mori mijëra jetë dhe zhvendosi miliona njerëz.