Forumi Ekonomik Botëror: Rritja cilësore e Kinës injekton stabilitet në ekonominë globale

Drejtori menaxhues i Forumit Ekonomik Botëror, Maroun Kairouz, tha se mes tensioneve gjeopolitike globale dhe rreziqeve ekonomike në rritje, tranzicioni i Kinës nga zhvillimi me shpejtësi të lartë në atë me cilësi të lartë, po i jep besim dhe stabilitet ekonomisë globale.

Kairouz e përshkruan tranzicionin e Kinës si një ndryshim strategjik që synon një zhvillim më të qëndrueshëm dhe elastik, duke vlerësuar reformat strukturore që po kalon aktualisht Kina.

Ai tha se tranzicioni pasqyron një fokus në inovacion, produktivitet dhe stabilitet afatgjatë. Sinjalet pozitive të këtij ndryshimi janë veçanërisht të dukshme në sektorin e energjisë. Në vitin 2024, investimet e Kinës në energjinë e pastër arritën në 818 miliardë dollarë, 20% më shumë se një vit më parë.

Ndërkohë, ekonomia dixhitale, e karakterizuar nga inteligjenca artificiale (IA), prodhimi i përparuar dhe shërbimet dixhitale, po përmirëson ndjeshëm efikasitetin në shumë sektorë kinezë.

Këto reforma, tha ai, jo vetëm që forcojnë qëndrueshmërinë ekonomike të Kinës, por krijojnë edhe mundësi të reja globale në energjinë e pastër, teknologjinë dhe tregtinë për vitin 2026 dhe më tej. Ky progres ndihmon në adresimin e sfidave të përbashkëta, në një mjedis global të pasigurt.

Lidhur me “forcat prodhuese me cilësi të re”, Kairouz tha se investimi masiv i Kinës në prodhim të përparuar dhe teknologji të gjelbër, tregon se si inovacioni mund të zbatohet në shkallë të gjerë.

Ai vuri në dukje se gati 40% e fabrikave “Global Lighthouse” të Forumit Ekonomik Botëror ndodhen në Kinë dhe se këto fabrika udhëheqin botën në zbatimin e teknologjive të Revolucionit të Katërt Industrial për të nxitur produktivitetin dhe qëndrueshmërinë.

Drejtori tha se Kina zotëron një nga zinxhirët e prodhimit më konkurrues në botë. Si pasojë, zhvillimet në Kinë kanë pa diskutim pasoja globale. Pikat e forta të Kinës në teknologjinë e gjelbër dhe prodhimin e përparuar, luajnë një rol jetik në adresimin e sfidave të ndryshimeve klimatike dhe pasigurisë së zinxhirëve të furnizimit.

Mes rritjes së proteksionizmit tregtar global, Kairouz bëri thirrje për shfrytëzimin e mekanizmave shumëpalësh, për të balancuar konkurrencën e shëndetshme kundrejt barrierave tregtare.

Duke cituar të dhëna nga Organizata Botërore e Tregtisë, ai vuri në dukje se tregtia globale vazhdon të rritet dhe ekonomitë mbeten aktive në lehtësimin e tregtisë. Përpjekje të tilla u lejojnë vendeve të ndjekin më mirë rezultate fitimprurëse në një mjedis kompleks.

Përballë transformimit të tregut të punës të nxitur nga AI dhe automatizimi, Kairouz tha se parimi i Kinës për integrimin e strategjive industriale, dixhitale dhe klimatike me zhvillimin e aftësive, ofron mësime të vlefshme për tregjet e tjera në zhvillim.

Tema e Takimit Vjetor 2026 është “Fryma e Dialogut”. Kairouz tha se në një epokë sfidash të shumëfishta globale, dialogu nuk është më opsional, por është thelbësor. Vlera më e madhe e këtij dialogu qëndron në ndërtimin e besimit, themeli për rritjen dhe stabilitetin ekonomik global.