Skandali botëror i Epstein/ Kryeministri Tusk: Dyshohet për bashkëpunim midis Jeffrey dhe Shërbimeve sekrete ruse

Kryeministri polak, Donald Tusk, njoftoi nisjen e një hetimi mbi lidhjet e mundshme të Jeffrey Epstein me Shërbimet Sekrete Ruse dhe pasojat që ato mund të kenë pasur për Poloninë.

Vendimi u bë i ditur gjatë një mbledhjeje të Këshillit të Ministrave, ku u trajtua një çështje e rëndësishme për sigurinë kombëtare.

Autoritetet polake do të formojnë një grup të posaçëm hetimor, i cili do të shqyrtojë nëse krimet e Epstein dhe përfshirja e mundshme e tij me Shërbimet Sekrete Ruse kanë pasur pasoja direkte ose të tërthorta për shtetin polak.

Rritja e informacionit dhe publikimeve në shtypin ndërkombëtar ka nxitur dyshime për një veprim të organizuar me implikime gjeopolitike.

Skandali i Epstein po analizohet gjithashtu në kontekstin e mundësisë së përfshirjes ruse, një element që mund të përbëjë kërcënim serioz për sigurinë e Polonisë.

Ekspertët paralajmërojnë se mund të ekzistojnë materiale inkriminuese ndaj politikanëve dhe udhëheqësve ndërkombëtarë.

Në këtë moment, as Ministria e Jashtme e Rusisë dhe as Ambasada Ruse në Varshavë nuk kanë reaguar ndaj kërkesave për komente mbi këtë hetim.