FIFA po planifikon një turne të ri, me ndeshjen hapëse Izrael – Palestinë

Gianni Infantino po shtyn idenë që FIFA të organizojë një turne të ri për moshat U-15, ku të përfshihen të gjitha 211 federatat anëtare, përfshirë Izraelin, Palestinën dhe Rusinë.

Sipas raportimeve, turneu do të zhvillohet në Shtetet e Bashkuara në shtator dhe Infantino po përpiqet ta paraqesë si një iniciativë “paqebërëse” përmes futbollit.

Ai madje dëshiron që Izraeli dhe Palestina të përballen në ndeshjen hapëse të kompeticionit, pavarësisht konfliktit të vazhdueshëm mes tyre.

Në prill, gjatë Kongresit të FIFA-s në Vancouver, Infantino tentoi të organizonte një shtrëngim duarsh mes përfaqësuesve të dy federatave, por të dy palët refuzuan.

Zëvendëspresidentja e Federatës Palestineze të Futbollit, Susan Shalabi, deklaroi më pas: “Nuk mund t’i jap dorën dikujt që është pjesë e një sistemi që po përdor sportin për të justifikuar padrejtësi. Ne po vuajmë.”

Pavarësisht kësaj situate të tensionuar, Infantino ka vazhduar të promovojë idenë se futbolli mund të shërbejë si urë paqeje.

Ai u shpreh: “Faleminderit përfaqësuesve të Izraelit dhe Palestinës, të cilët kanë të njëjtat të drejta dhe përgjegjësi si anëtarë të FIFA-s. Le të punojmë së bashku për t’u dhënë shpresë fëmijëve”.

Turneu i propozuar U-15 është prezantuar si një format “festival”, ku fillimisht në vitin 2026 do të marrin pjesë vetëm ekipet e djemve, ndërsa në vitin 2027 do të përfshihen edhe ekipet e vajzave.

Nga viti 2028 e tutje, të gjitha federatat anëtare do të kenë mundësi të marrin pjesë me ekipe U-15 për djem dhe vajza, ndërsa ndeshjet do të jenë më të shkurtra dhe në fusha më të vogla.

Turneu pritet të zhvillohet në Miami, ku FIFA ka edhe disa zyra.

Në të njëjtën kohë, Rusia do të lejohet të marrë pjesë në këtë turne, pavarësisht se kombëtarja e saj e të rriturve është e pezulluar nga kompeticionet e FIFA-s që nga viti 2022 për shkak të pushtimit të Ukrainës.

Vladimir Putin dhe zyrtarët rusë e kanë mirëpritur shpesh idenë e rikthimit gradual në garat ndërkombëtare të futbollit, ndërsa FIFA ka argumentuar më herët se ndalimi i Rusisë “nuk ka sjellë rezultate pozitive” në zgjidhjen e situatës.