Brikena Ramadani mohon akuzat për paga në disa institucione: Po linçohem me shpifje dhe manipulime
Brikena Ramadani ka reaguar publikisht ndaj, siç i quan ajo, shpifjeve dhe sulmeve që po qarkullojnë ditëve të fundit në profile anonime dhe portale, ku pretendohet se ajo merr paga nga disa institucione njëkohësisht.
Në reagimin e saj, Ramadani thekson se prej vitit 2012 është e angazhuar në Komunën e Sarajit, ku ka ushtruar detyrat e saj me profesionalizëm dhe përgjegjësi. Ajo nënvizon se është magjistre e Arkitekturës dhe urbaniste e licencuar, duke shtuar se karrierën e ka ndërtuar mbi arsimimin dhe punën profesionale.
Duke iu referuar pretendimeve për angazhimin e saj në Komunën e Tetovës, Ramadani sqaron se mjetet e përmendura në publik janë kompensim për angazhimin e saj si anëtare e Komisionit Zgjedhor.
“Si çdo anëtar tjetër i komisioneve zgjedhore që ka marrë kompensim për punën e kryer gjatë ditës së zgjedhjeve, edhe unë kam marrë pagesën që më takon sipas ligjit dhe procedurave përkatëse”, thekson ajo.
Sa i përket angazhimit në Ministrinë e Mjedisit dhe Planifikimit Hapësinor, Ramadani bën të ditur se është pjesë e një projekti ndërkombëtar me kohëzgjatje të caktuar, duke shtuar se është përzgjedhur përmes thirrjes publike në bazë të kualifikimeve profesionale.
Ajo shpreh shqetësim edhe për përfshirjen e familjes së saj në këto sulme, duke dënuar publikimin e fotografive të një vajze të re që, sipas saj, nuk ka asnjë lidhje me çështjen.
“Janë kaluar të gjithë kufijtë e njerëzimit, etikës dhe moralit. Asnjë grua, asnjë nënë dhe asnjë profesioniste nuk meriton të bëhet objekt i fushatave të tilla denigruese”, shkruan Ramadani.
Në fund, ajo u bën thirrje qytetarëve të mos bien pre e manipulimeve dhe fabrikimeve të profileve anonime dhe portaleve që, sipas saj, kanë humbur standardet profesionale dhe njerëzore.
