Arbër Ademi: Gjykata Kushtetuese nxori në shesh pafuqinë dhe gënjeshtrat e VLEN-it
Arbër Ademi, ka akuzuar koalicionin VLEN dhe kryetarin e Komunës së Tetovës, Bilall Kasami, për mosveprim në mbrojtjen e emrave shqip të rrugëve në Tetovë, pas vendimit të fundit të Gjykatës Kushtetuese për shfuqizimin e vendimit të vitit 2007 për emërtimin e rrugëve dhe shesheve në qytet.
“Gjykata Kushtetuese nxori në shesh pafuqinë dhe gënjeshtrat e VLEN-it”, deklaroi Ademi.
Sipas tij, kryetari i Komunës së Tetovës, Bilall Kasami, për 14 muaj nuk ka ndërmarrë asnjë hap për mbrojtjen e emrave shqip të rrugëve.
“Bilall Kasami, për 14 muaj, nuk ndërmori asgjë për t’i ruajtur emrat shqip në Tetovë. Bilall Kasamit katër herë iu kërkua nga Gjykata Kushtetuese që të dorëzonte dokumente, por ai nuk bëri asgjë”, tha Ademi.
Ai akuzoi edhe Qeverinë, pjesë e së cilës është VLEN-i, se nuk ka vepruar për ta mbrojtur vendimin për emërtimet e rrugëve.
“Qeveria ku bën pjesë VLEN-i, tri herë nuk ka dorëzuar dokumentacion për t’i mbrojtur emrat shqip në Tetovë”, deklaroi Ademi.
Duke komentuar rikthimin e disa emërtimeve të mëparshme të rrugëve, Ademi përdori tone të ashpra ndaj kundërshtarëve politikë.
“E dimë se e doni Titon, por duajeni në shtëpi. Shqiptarët me kohë i kanë dhënë përgjigjen e merituar Titos”, u shpreh ai.
Vendimi i Gjykatës Kushtetuese për shfuqizimin e emërtimeve të rrugëve në Tetovë ka nxitur reagime të shumta politike dhe debat publik lidhur me identitetin dhe simbolikën e emrave në hapësirat publike të qytetit. Gazeta Flaka
