Mickoski: “Vezillka” përfaqëson fillimin e një procesi që do të kontribuojë për një shkencë më të fortë, një ekonomi më konkurruese dhe më shumë mundësi për të rinjtë

Ekzistojnë projekte vlera e të cilëve nuk matet vetëm përmes investimit që sjellin apo infrastrukturës që krijojnë, por përmes aftësisë së tyre për ta ndryshuar drejtimin në të cilin lëviz një shoqëri.

Projekti “Vezillka” është pikërisht një projekt i tillë. Ai paraqet një investim në të ardhmen, në potencialin e shkencëtarëve, studiuesve, studentëve dhe kompanive maqedonase, por edhe një përcaktim të qartë që shteti të jetë pjesëmarrës aktiv në proceset teknologjike që e formësojnë botën bashkëkohore.

Zhvillimi i inteligjencës artificiale tashmë po krijon modele të reja ekonomike, po hap industri të reja dhe po vendos standarde të reja për konkurrueshmërinë.

Në rrethana të tilla, aftësia e një shteti për të krijuar dije, për të lidhur shkencën me ekonominë dhe për të siguruar kushte për inovacione bëhet një nga parakushtet më të rëndësishme për zhvillim afatgjatë.

Pikërisht për këtë arsye, themelimi i Qendrës Nacionale për Inteligjencë Artificiale paraqet një hap që ka rëndësi shumë më tej se kornizat e një projekti të vetëm.

Vlera e veçantë e “Vezillka” është se pas saj qëndron një vizion i përbashkët i Qeverisë, komunitetit akademik dhe Bashkimit Evropian.

Partneritet e tilla krijojnë rezultate të qëndrueshme sepse bashkojnë dijen, përvojën dhe burimet rreth një qëllimi të përbashkët – krijimin e një Maqedonie bashkëkohore, konkurruese dhe inovative, të përgatitur për sfidat dhe mundësitë e kohës së re.

Përmes kësaj qendre hapen perspektiva të reja për studiuesit dhe universitetet maqedonase, për komunitetin e start-up-eve dhe për kompanitë që duan të zhvillojnë produkte dhe shërbime me vlerë të shtuar të lartë.

Qasja në infrastrukturën evropiane për inteligjencën artificiale dhe në kapacitetet e avancuara të superkompjuterëve do të mundësojë që idetë e krijuara këtu të marrin mundësinë të konkurrojnë në nivel evropian dhe global.

Kjo paraqet një nxitje të fortë për rritjen ekonomike, për hapjen e vendeve të reja të punës dhe për krijimin e mundësive të reja për gjeneratat që vijnë.

Si profesor universitar, gjithmonë kam besuar se burimi më i fortë i çdo shteti janë njerëzit.

Dija që ata zotërojnë, talenti që zhvillojnë dhe idetë që krijojnë janë baza më e sigurt mbi të cilën mund të ndërtohet një e ardhme prosperuese.

Prandaj çdo investim në shkencë dhe hulumtim është një investim që me kalimin e kohës sjell kthimin më të madh për shoqërinë.
Veçanërisht rëndësi ka edhe fakti që “Vezillka” do të kontribuojë për zhvillimin e modeleve gjuhësore maqedonase dhe mjeteve digjitale në gjuhën maqedonase.

Në kohë kur teknologjitë e reja gjithnjë e më shumë shndërrohen në hapësirë ku krijohet dhe shpërndahet dije, prania e gjuhës amtare paraqet një çështje të vazhdimësisë kulturore, zhvillimit shkencor dhe vetëbesimit nacional.

Në këtë mënyrë krijohen kushte që gjuha maqedonase të jetë e pranishme në mënyrë të barabartë në proceset teknologjike bashkëkohore dhe e qasshme për gjeneratat e ardhshme në epokën digjitale.

Dërgoj urime të sinqerta për FSHIIK dhe Universitetin “Shën Kirili dhe Metodi” për përkushtimin, profesionalizmin dhe vizionin e tyre, si dhe mirënjohje ndaj Bashkimit Evropian për mbështetjen dhe besimin që e shfaq ndaj këtij projekti të rëndësishëm.

Mirënjohje meriton edhe Ministria për Transformimit Digjital, e cila pa një mundësi që mund të krijojë vlerë afatgjatë për shtetin dhe e shndërroi në një nismë konkrete me rëndësi kombëtare.

“Vezillka” paraqet fillimin e një procesi që do të kontribuojë për një shkencë më të fortë, një ekonomi më konkurruese dhe më shumë mundësi për të rinjtë.

Proces që do të ndihmojë Maqedoninë të pozicionohet aty ku dija ka rëndësi të madhe dhe, në të njëjtën kohë, të mbështesë inovacionin dhe të krijojë kushte që e ardhmja të ndërtohet në vend, me potencial vendas, ekspertizë vendase dhe vizion vendas.