Rritet presioni, tetori e pret Realin me disa teste të vështira

Humbja e Real Madridit në derbin ndaj Atletico Madridit ka lënë pas vetes më shumë se vetëm tri pikë.

Humbja në “Riyadh Air Metropolitano” të dielën në mbrëmje ka dëmtuar ritmin e skuadrës dhe e ka vendosur ekipin e Jose Mourinhos nën presion të madh që në fillim të sezonit, duke bërë që të ketë nevojë për një reagim të menjëhershëm.

Pasi kanë marrë 15 pikë nga 21 të mundshme në shtatë ndeshjet e para, “Los Merengues” tani ndodhen gjashtë pikë prapa liderit të ligës, Barcelonës, e cila ka fituar çdo ndeshje të kampionatit deri më tani.

Humbja gjithashtu u ka kushtuar vendin e dytë, me Atletico Madridin që është ngjitur mbi ta me 16 pikë, një më shumë se fqinjët e tyre.

Real Madridi kishte bërë një nisje të respektueshme në sezonin e parë të Mourinhos në krye të skuadrës, por dy humbjet në shtatë ndeshjet e para tani kanë shtuar presionin mbi ekipin.

Edhe mënyra se si erdhi humbja e fundit është shqetësuese.

Atletico ishte skuadra më e mirë për periudha të gjata në “Metropolitano”, duke i lënë “Los Blancos” me shumë gjëra për të adresuar gjatë pushimit ndërkombëtar.

Pushimi ndërkombëtar i jep Mourinhos dhe lojtarëve të tij kohë për të analizuar se çfarë shkoi keq, megjithëse ndërprerja do të thotë se ata nuk do ta kenë të gjithë skuadrën së bashku për pjesën më të madhe të kësaj periudhe.

Sapo lojtarët të rikthehen, do të ketë shumë pak kohë për t’u rikuperuar.

Testi i parë i Real Madridit vjen më 10 tetor ndaj Villarrealit në “Bernabeu”.

Vetëm katër ditë më vonë, ata udhëtojnë në Itali për t’u përballur me AS Romën në Ligën e Kampionëve, përpara se të rikthehen në shtëpi për të luajtur ndaj Sevillas më 18 tetor.

Më pas fillon periudha më e vështirë.

RB Leipzigu do ta vizitojë “Bernabeun” më 21 tetor për një ndeshje të Championsit, dhe vetëm katër ditë më vonë klubi nga kryeqyteti spanjoll do të udhëtojë në “Spotify Camp Nou” për “El Clasicon” e parë të sezonit ndaj Barcelonës, më 25 tetor.

Kjo do të thotë pesë ndeshje në vetëm 16 ditë, me shumë pak hapësirë për një tjetër pengesë.

Tri ndeshjet e kampionatit ndaj Villarrealit, Sevillas dhe Barcelonës do të jenë veçanërisht të rëndësishme.

Real Madridi duhet të ndalojë rritjen e diferencës në krye, ndërsa edhe fushata e tyre në Champions do të kërkojë vëmendje.

AS Roma dhe Leipzigu vijnë në mes të kësaj serie të vështirë, pas fitores 2-1 të Real Madridit ndaj Interit në ndeshjen e tyre të parë evropiane.

Real Madridi do ta përfundojë kalendarin e vështirë të tetorit në “Camp Nou” dhe, duke pasur parasysh renditjen aktuale, kjo ndeshje mund të ketë peshë të konsiderueshme.

Ende ka disa xhiro të kampionatit për t’u zhvilluar deri atëherë dhe tabela mund të ndryshojë ndjeshëm, por diferenca prej gjashtë pikësh mes dy klubeve i jep ndeshjes një rëndësi shtesë.

Barcelona ka bërë një nisje të jashtëzakonshme, ndërsa Real Madridi sapo ka pësuar pengesën e parë të madhe të sezonit.

Pushimi ndërkombëtar i jep Mourinhos një mundësi për të analizuar problemet e shfaqura në derbi, por sapo të nisë tetori, do të ketë shumë pak kohë për eksperimente.

Javët e ardhshme do të jenë një test i hershëm nëse kjo skuadër e Real Madridit mund t’i përgjigjet pengesës së parë serioze dhe të mbajë hapin me një ekip të Barcelonës që e ka nisur sezonin në mënyrë perfekte.