Beteja ligjore fillon! Klubet e Premierligës kërkojnë kompenzim nga City, pas vendimit se është fajtor

Manchester City po përgatitet për një valë masive padish nga rivalët e tij vendas, pas një vendimi historik lidhur me sjelljen e klubit në aspektin financiar.

Disa klube të Premierligës tashmë kanë nisur të koordinohen me ekspertë ligjorë për të kërkuar kompensime të konsiderueshme ndaj Cityt.

Kategoria elitare e futbollit anglez është tronditur thellë pas lajmit se Manchester City është shpallur fajtor për shkeljen e pjesës dërrmuese të akuzave financiare të ngritura ndaj tij.

Në atë që po përshkruhet si një moment potencialisht vendimtar për futbollin, paneli i pavarur përcaktoi se klubi kishte dështuar të respektonte 114 nga 115 akuzat.

Sipas “The Athletic”, disa klube të Premierligës kanë mobilizuar avokatë të njohur për të vlerësuar shkallën e dëmeve për të cilat mund të kërkojnë kompensim, për humbjet e pësuara në të kaluarën.

Përmasat e padive të mundshme janë marramendëse, ndërsa raportimet sugjerojnë se klubet e prekura tashmë janë përfshirë në diskutime të nivelit të lartë lidhur me një strategji të përbashkët.

Firmat ligjore raportohet se kanë qenë proaktive në kontaktimin e klubeve të Premierligës, duke i këshilluar se tani janë në një pozicion të favorshëm për të kërkuar kompensim financiar.

Një faktor kyç në këto beteja ligjore që po përgatiten është një vendim i mëparshëm që përfshinte klube të tjera të Premierligës dhe që krijoi një rrugë të qartë për kompensimet.

Një komision i pavarur kishte vendosur më parë që Evertoni t’i paguante Burnleyt 35.1 milionë funte, pasi shkelja e Rregullave të Rentabilitetit dhe Qëndrueshmërisë nga Evertoni u konsiderua se kishte sjellë një avantazh sportiv.

Megjithatë, çdo procedurë formale ka të ngjarë të vonohet derisa të përfundojë i gjithë procesi i apelimit. Manchester City ka këmbëngulur vazhdimisht në pafajësinë e tij dhe pritet ta luftojë vendimin me çdo mjet ligjor në dispozicion.

Zëdhënësi i klubit dha një përgjigje të prerë ndaj zhvillimeve të fundit, duke deklaruar: “Procesi i Premierligës vazhdon, me elemente të rëndësishme që ende duhet të përfundojnë, dhe i nënshtrohet konfidencialitetit të rreptë. Si i tillë, qëndrimi i Manchester City FC mbetet në përputhje me deklaratën e klubit të shkurtit 2023”.

Natyra specifike e kërkesave mund të ndryshojë ndjeshëm, në varësi të klubit të përfshirë.

Disa skuadra mund të argumentojnë se shkeljet e pretenduara të rregullave nga City u kushtuan drejtpërdrejt një vend në Champions, duke rezultuar në humbje prej dhjetëra milionë funtesh nga të ardhurat televizive dhe të ardhurat nga ndeshjet.

Për më tepër, humbja e trofeve ose kualifikimit evropian shpesh aktivizon klauzola në kontratat komerciale, që do të thotë se klubet potencialisht mund të humbnin bonuse të mundshme nga sponsorët si një tjetër pasojë e çekuilibrit sportiv.

Mundësia e një padie masive kolektive tani po diskutohet seriozisht nga drejtuesit në të gjithë ligën.

Kjo mbikëqyrje ligjore mbulon një periudhë të trazuar nga viti 2009 deri në vitin 2018, gjatë së cilës “Cityzens” u shndërruan në një fuqi globale.

Ndërsa klubi kishte parë më parë një ndalim nga UEFA të rrëzohej nga Gjykata e Arbitrazhit Sportiv, pasi provat ishin “të parashkruara”, rregullat specifike të Premierligës nuk kanë të njëjtat kufizime.